🔹 সাংসদ হিচাপে শপত গ্ৰহণ
বিশেষ বাৰ্তা, ৫ জুলাই : কাৰাবন্দী ৱাৰিছ পঞ্জাব ডে’ৰ মুৰব্বী অমৃতপল সিঙক কটকটীয়া নিৰাপত্তা বেষ্টনীৰ মাজেৰে আজি সেনা বাহিনীৰ এখন বিশেষ বিমানেৰে ডিব্ৰুগড়ৰ পৰা নতুন দিল্লীলৈ লৈ যোৱা হয়। দিল্লীত আজি দিনৰ ভাগতে অমৃতপলে সংসদ সদস্য হিচাপে শপত গ্ৰহণ কৰে। ৰাষ্ট্ৰীয় নিৰাপত্তা আইন (এন এছ এ)ৰ অধীনত ২০২৩ চনৰ ২৩ এপ্ৰিলৰ পৰা উচ্চ নিৰাপত্তাসম্পন্ন ডিব্ৰুগড় কেন্দ্ৰীয় কাৰাগাৰত কাৰাৰুদ্ধ হৈ থকা সিঙক ইয়াৰ পূৰ্বে পঞ্জাবৰ অমৃতসৰৰ জিলা দণ্ডাধীশে শপতগ্ৰহণ অনুষ্ঠানত অংশগ্ৰহণ কৰিবলৈ চাৰি দিনৰ পেৰ’ল প্ৰদান কৰিছিল। উল্লেখ্য যে কাৰাগাৰৰ সকলো নিয়ম পালন কৰাৰ পাছত ৭খন আৰক্ষী বাহনৰ এক কনভয়ৰ সৈতে সিঙক ডিব্ৰুগড় কেন্দ্ৰীয় কাৰাগাৰৰ পৰা ডিব্ৰুগড় বিমানবন্দৰলৈ কঠোৰ নিৰাপত্তা বেষ্টনীৰ মাজেৰে লৈ যোৱা হয়। ডিব্ৰুগড়ৰ কেন্দ্ৰীয় কাৰাগাৰৰ এজন বিষয়াই জনোৱা মতে, প্ৰবল বৰষুণৰ মাজতে আজি পুৱা ৩.৫২ বজাত অমৃতপলক এখন আৰক্ষীৰ গাড়ীত উঠাই পুৱা ৪ বজাত জে’লৰ গেটৰ পৰা ওলাই যায় বিমানবন্দৰ মোহনবাৰীৰ দিশে। অমৃতপলক নিবলৈ পঞ্জাব আৰক্ষীৰ আৰক্ষী অধীক্ষকৰ নেতৃত্বত অহা আঠজনীয়া দল কালিয়েই ডিব্ৰুগড়ত উপস্থিত হৈছিল। আজি অসম আৰক্ষীৰ এটা দলেও পঞ্জাব আৰক্ষীৰ দলৰ সৈতে সহযোগিতা কৰি খালিস্তানী সমৰ্থক নেতাগৰাকীক ডিব্ৰুগড়ৰ মোহনবাৰী বিমানবন্দৰলৈ সুচাৰুৰূপে হস্তান্তৰ কৰাত সহায় কৰে। ইফালে, ১০ বিশেষ চৰ্ত অনুসৰি অমৃতপলক চাৰি দিনৰ পেৰ’ল দিয়া হৈছে। চৰ্ত অনুসৰি নতুন দিল্লী পোৱাৰ লগে লগে সিঙক পৰিয়ালক লগ কৰিবলৈ দিয়া হ’ব যদিও দেশৰ ৰাজধানীৰ “টেৰিটৰিয়েল জুৰিচিডিকচন” এৰি যাবলৈ দিয়া নহ’ব। অমৃতসৰৰ জিলা দণ্ডাধীশে জাৰি কৰা পেৰ’ল আদেশত সিং আৰু তেওঁৰ পৰিয়ালে নতুন দিল্লীত থকাৰ সময়ছোৱাত সংবাদ মাধ্যমত কোনোধৰণৰ বক্তব্য দিয়াৰ ক্ষেত্ৰতো বাধা আৰোপ কৰা হৈছে। এই আদেশত দহটা চৰ্তৰ ভিতৰত আন এক চৰ্ত অনুসৰি সিং বা তেওঁৰ আত্মীয়ই কোনো বক্তব্য ভিডিঅ’গ্ৰাফী বা কোনো ইলেক্ট্ৰনিক ৰূপত প্ৰচাৰ কৰাত নিষেধাজ্ঞা আৰোপ কৰিছে। ইয়াৰ উপৰি সিঙক কোনো ৰাষ্ট্ৰীয় নিৰাপত্তাৰ প্ৰতি ক্ষতিকাৰক বক্তব্য নিদিবলৈকো নিৰ্দেশ দিয়া হৈছে। অমৃতসৰ (গ্ৰাম্য)ৰ জ্যেষ্ঠ আৰক্ষী অধীক্ষকে নিৰ্ধাৰণ কৰা অনুসৰি সিঙৰ লগত উপযুক্তসংখ্যক আৰক্ষী কৰ্মী থাকিব বুলি নিৰ্দেশত উল্লেখ কৰা হৈছে। কাৰাগাৰৰ পৰা অস্থায়ীভাৱে মুক্তি পোৱাৰ পৰা সিঙৰ আটকৰ সময়সীমা অব্যাহত ৰখাৰ পৰা ঘূৰি অহালৈকে নিৰাপত্তাৰক্ষীসকল সিঙৰ লগত থাকিব। নতুন দিল্লীত থকাৰ সময়ত সিং সংসদৰ চৌহদৰ ভিতৰত থাকিলে লোকসভাৰ মহাসচিবৰ অনুমতি অনুসৰি আৰক্ষী জোৱান বা অন্যান্য নিৰাপত্তাৰক্ষীৰ সুৰক্ষাৰ অধীনত থাকিব। যেতিয়া সিঙক সংসদত প্ৰয়োজন নহ’ব, তেতিয়া তেওঁক নিৰাপত্তাৰ ভিত্তিত এছএছপি, অমৃতসৰ (গ্ৰাম্য)ই উপযুক্ত বুলি বিবেচনা কৰা নতুন দিল্লীৰ স্থানত ৰখা হ’ব। কাৰাগাৰৰ আঁৰৰ পৰা ৰাজনীতিত অমৃতপল সিঙৰ আগ্ৰাসন এক উল্লেখযোগ্য। ডিব্ৰুগড় কেন্দ্ৰীয় কাৰাগাৰত বন্দী হৈ থকাৰ পিছতো তেওঁ নিৰ্দলীয় প্ৰাৰ্থী হিচাপে পঞ্জাবৰ খাদূৰ চাহাব লোকসভাৰ আসনত তেওঁৰ নিকটতম প্ৰতিদ্বন্দ্বী কংগ্ৰেছৰ কুলবীৰ সিং জিৰাক ১,৯৭,১২০ ভোটৰ ব্যৱধানত পৰাস্ত কৰি এক উল্লেখযোগ্য জয়লাভ কৰিবলৈ সক্ষম হয়।
প্ৰেৰক বিভাস দুৱৰা