নিয়মীয়া বাৰ্তা, ৮ জুনঃ অৱশেষত অন্ত পৰিল মন্ত্ৰীসভাত কোনে নতুনকৈ স্থান লাভ কৰিব তাক লৈ চলি অহা জল্পনা-কল্পনাৰ। আজি ঘোষণা কৰা হল সম্প্ৰসাৰিত মন্ত্ৰীসভাৰ দুই মন্ত্ৰীৰ নাম। বহুদিনীয়া জল্পনা-কল্পনাৰ অন্ত পেলালে মুখ্যমন্ত্ৰী ড০ হিমন্ত বিশ্ব শৰ্মাই। ভাগ্য ফুলিল আগতে ঘোষণা কৰা অনুসৰি পাহাৰৰ জিলাৰ পৰা হাফলঙৰ বিধায়ক নন্দিতা গাৰ্লোছাৰ। লগতে কপাল ফুলিল নলবাৰীৰ বিধায়ক জয়ন্ত মল্ল বৰুৱাৰ। এটা বছৰ পূৰ্তিৰ পিছত ৰাজ্য চৰকাৰৰ মন্ত্ৰী সভাৰ সম্প্ৰসাৰণৰ সিদ্ধান্ত ললে মুখ্যমন্ত্ৰী ড০ হিমন্ত বিশ্ব শৰ্মাই। আজি আবেলি এই কথা ৰাজহুৱা কৰাৰ লগতে কাইলৈ গুৱাহাটীৰ শংকৰদেৱ কলাক্ষেত্ৰত এই সম্প্ৰসাৰিত মন্ত্ৰীসভাই শপতবাক্য পাঠ কৰিব। আজি ঘোষণা কৰা সম্প্ৰসাৰিত মন্ত্ৰী তালিকাত দুজন মন্ত্ৰীয়ে স্থান লাভ কৰিছে দুগৰাকী বিজেপি বিধায়কে। সেই অনুসৰি ড০ শৰ্মা কেবিনেটত স্থান লাভ কৰিছে হাফলঙৰ বিধায়িকা নন্দিতা গাৰ্লোছাই। মহিলা প্ৰতিনিধি হিচাপে মন্ত্ৰী আসন শুৱনি কৰিব গাৰ্লোছাই। উল্লেখ যে ইয়াৰ আগতে ৰাজ্য চৰকাৰৰ কেবিনেটত মহিলা প্ৰতিনিধি হিচাপে আছে গোলাঘাটৰ বিধায়িকা তথা বৰ্তমানৰ বিত্তমন্ত্ৰী অজন্ত নেওগ। আনহাতে আনগৰাকী মন্ত্ৰী হিচাপে ড০ শৰ্মা কেবিনেটত সোমাব নলবাৰীৰ বিধায়ক জয়ন্ত মল্ল বৰুৱা। উল্লেখ যে কাইলৈল শংকৰদেৱ কলাক্ষেত্ৰত অনুষ্ঠিত হব লগা শপতগ্ৰহণ অনুষ্ঠানত দুয়োগৰাকী নৱনিৰ্বাচিত মন্ত্ৰীয়ে শপতবাক্য পাঠ কৰিব। এই মুহূৰ্তলৈ এই নৱনিৰ্বাচিত মন্ত্ৰীগৰাকীয়ে কি দপ্তৰ লাভ কৰিব, সেই কথা অৱগত কৰা নাই মুখ্য়নন্ত্ৰীৰ ফালৰ পৰা। মন কৰিব লগীয়া যে ড০ শৰ্মা মন্ত্ৰীসভাত ১৩গৰাকী মন্ত্ৰী আছে। সেইকেইগৰাকী হল- বিজেপিৰ ফালৰ পৰাঃ ৰঞ্জিত কুমাৰ দাস, পৰিমল শুক্লবৈদ্য, চন্দ্ৰমোহন পাটোৱাৰী, ৰণোজ পেগু, সঞ্জয় কিষাণ, যোগেন মহন, অজন্তা নেওগ, অশোক সিংহল, পীয়ূষ হাজৰিকা, বিমল বৰা। অগপৰ ফালৰ পৰাঃ অতুল বৰা আৰু কেশৱ মহন্ত। ইউপিপিএলৰ ফালৰ পৰাঃ উৰ্খাও গৌৰা ব্ৰহ্ম। আজি ঘোষিত দুয়োগৰাকীকে ধৰি বিজেপিৰ ১২গৰাকী, অগপৰ দুগৰাকী আৰু ইউপিপিএলৰ পৰা এগৰাকী মন্ত্ৰী ড০ শৰ্মা কেবিনেটত আছে। আনহাতে ড০ শৰ্মা কেবিনেটত আৰু ৩গৰাকী মন্ত্ৰীৰ আসন খালী হৈ আছে। অনাগত সময়ত সেই তিনিখন আসন কাৰ ভাগ্যত ফুলিব সেয়া সময়তহে লক্ষণীয় হব।