নিয়মীয়া বাৰ্তা ১২ এপ্ৰিলঃ ৰাজ্যজুৰি ক’ভিডৰ সংক্রমণ দ্রুত হাৰত বৃদ্ধি পোৱাৰ সময়তে ৰাইজক আতংকিত নহ’বলৈ আহ্বান জনাইছে স্বাস্থ্যমন্ত্রী ড০ হিমন্ত বিশ্ব শর্মাই৷ ইয়াৰ পৰিৱর্তে ৰাজ্যবাসীক সাৱধানে থকাৰ লগতে সামান্য অসুস্থ হ’লেই পৰীক্ষা কৰাবলৈ আহ্বান জনাইছে৷ দেওবাৰে কালাপাহাৰস্থিত ক’ভিড হাস্পতাল পৰিদর্শন কৰাৰ পাছত সংবাদ মাধ্যমৰ আগত মন্ত্রীগৰাকীয়ে কয় যে বর্তমান ক’ভিড পৰীক্ষাৰ লগতে প্রতিষেধক প্রদানৰ ক্ষেত্রত সর্বাধিক গুৰুত্ব প্রদান কৰা হৈছে৷ এই প্রসংগতে তেওঁ কয়– ‘আজি প্রায় ৭৫ হাজাৰ পৰীক্ষা সম্পন্ন কৰা হ’ব৷ আগন্তুক ৩–৪ দিনলৈ প্রায় এক লাখকৈ নিতৌ পৰীক্ষা কৰা হ’ব৷ ইতিমধ্যে বাংগালুৰু আৰু মুম্বাইৰ পৰা অহা যাত্রীৰ ক্ষেত্রত ক’ভিডৰ পৰীক্ষা বাধ্যতামূলক কৰা হৈছিল৷ দুই–এদিনৰ ভিতৰত দিল্লী আৰু কলকাতাৰ পৰা অহা যাত্রীৰ ক্ষেত্রতো পৰীক্ষা বাধ্যতামূলক কৰা হ’ব৷ অহা সপ্তাহৰ পৰা সকলো যাত্রীৰ বিমানবন্দৰত পৰীক্ষা বাধ্যতামূলক কৰা হ’ব৷ ইয়াৰ লগে লগে ভেকচিন প্রদান দ্রুতগতিত বৃদ্ধি কৰিবলৈ আমি চেষ্টা চলাইছোঁ৷’
ইফালে, ৰাজ্যত ভেকচিনৰ নাটনি হোৱা নাই বুলি উল্লেখ কৰি স্বাস্থ্যমন্ত্রীগৰাকীয়্ কয় যে দেশজুৰি আকস্মিকভাৱে ভেকচিনৰ চাহিদা বৃদ্ধি পাইছে৷ প্রথম অৱস্থাত ভেকচিন লোৱা লোকৰ অভাৱ আছিল৷ কিন্তু এতিয়া অসমতো আকস্মিকভাৱে ভেকচিনৰ চাহিদা বাঢ়িছে৷ এতিয়াও দুই লাখ ভেকচিনৰ ড’জ মজুত আছে৷ অহা ১৩ এপ্রিলৰ পৰা পুনৰ অসমে ৩–৪ লাখ ভেকচিনৰ ড’জ লাভ কৰিব৷ সমান্তৰালভাৱে ক’ভিড সংক্রমণ বৃদ্ধিৰ লগে লগে পুনৰ লকডাউন হ’ব বুলি চলা চর্চা সন্দর্ভত প্রতিক্রিয়া প্রকাশ কৰি মন্ত্রীগৰাকীয়ে কয়– ‘অসমত লকডাউনৰ পৰিৱেশ নাই৷ এইকেইটা দিনত আক্রান্তৰ তথ্য বিশ্লেষণ কৰিলে আমি গম পাওঁ যে আক্রান্তৰ হাৰ হৈছে ০.৫ শতাংশ৷ যেতিয়ালৈকে ক’ভিড থাকিব, তেতিয়ালৈ ০.৫ শতাংশ আক্রান্ত লোক থাকিবই৷ লকডাউন ঘোষণা কৰিলেও আক্রান্তৰ হাৰ ০.৫ শতাংশলৈকে নমাব পাৰি৷ লকডাউন দিলেও ইয়াতকৈ ভাল ফলাফল আমি নাপাম৷ লকডাউন ঘোষণা কৰিলে ক’ভিড আমাৰ মাজৰ পৰা নোহোৱা হৈ নাযায়৷ হয়তো এসপ্তাহ বা দুসপ্তাহ নোহোৱা হ’ব, কিন্তু পুনৰ আক্রান্ত হ’ব৷ সেয়েহে লকডাউনৰ কথা চিন্তা কৰা হোৱা নাই৷ আনকি আমি ৰাজ্যত বিহু অনুষ্ঠিত কৰিবলৈ অনুমতি দিছোঁ৷’
উল্লেখ্য যে ৰাজ্যত ৰঙালী বিহু উদ্যাপনৰ ক্ষেত্রত ৰাজ্য চৰকাৰে জাৰি কৰিছে এছ অ’ পি৷ নিশা ১১ বজাৰ ভিতৰত বিহুৰ কার্যসূচী সমাপ্ত কৰাৰ লগতে আন কেতবোৰ নীতি–নির্দেশনা নির্ধাৰণ কৰি দিয়া হৈছে এই এছ অ’ পিৰ জৰিয়তে৷ অৱশ্যে মহানগৰীৰ বহুসংখ্যক বিহু কমিটীয়ে ইয়াৰ বিৰুদ্ধে প্রতিক্রিয়া প্রকাশ কৰিছে৷ বিহু কমিটীসমূহৰ প্রতিক্রিয়া সন্দর্ভত সংবাদ মাধ্যমে সোধা প্রশ্ণৰ উত্তৰত মন্ত্রী ড০ শর্মাই কয়– ‘বিহুৰ এছ অ’ পিক লৈ প্রতিক্রিয়া প্রকাশ কৰাৰ কোনো প্রয়োজন নাই৷ কাৰণ নির্বাচনৰ প্রচাৰ আমি ১০ বজালৈকে কৰিছিলোঁ৷ কিন্তু বিহু ১১ বজালৈ অনুষ্ঠিত কৰিবলৈ আমি অনুমতি দিছোঁ৷ ভাৰতৰ আন ৰাজ্যত নৈশ সান্ধ্য আইন বলৱৎ কৰা হৈছে৷ তেনে অৱস্থাত অসমত ওৰেনিশা বিহু অনুষ্ঠিত কৰিবলৈ অনুমতি দিলে আমাক সমালোচনা কৰিব৷ সেয়েহে আমি বহুত প্রত্যাহ্বান লৈ বিহু অনুষ্ঠিত কৰিবলৈ অনুমতি দিছোঁ৷ বিহু কমিটীসমূহ আৰু শিল্পীসকলে ইয়াক আদৰি ল’ব লাগে৷ ওৰেনিশা বিহু অনুষ্ঠিত কৰিবলৈ অনুমতি দিলে কেন্দ্রীয় চৰকাৰৰ পৰা বন্ধ কৰাৰ নির্দেশ আহি যাব৷ কিয়নো এইটো এটা ৰাষ্ট্রীয় দুর্যোগ৷’
ইফালে, ক’ভিড হাস্পতাল ৰাজ্যত সম্প্রতি বৃদ্ধি কৰাৰ প্রয়োজন নাই বুলি মন্ত্রীগৰাকীয়ে কয় যে বর্তমান জি এম চি এইচৰ উপৰি এম এম চি এইচ, সোণাপুৰ, শিঙিমাৰী আৰু কালাপাহাৰৰ হাস্পতাল সাজু হৈ আছে৷ কোনো লক্ষণ নথকা ৰোগীসকলক হাস্পতালত ৰখাৰ প্রয়োজন নাই৷ এই বিষয়টো আলোচনা কৰা হৈছে৷ কামৰূপ মহানগৰ জিলাৰ উপায়ুক্তৰে হোৱা আলোচনাত এনে ৰোগীসকলক ৰখাৰ বাবে দুখন হোটেল অথবা ধৰমশালাৰ ব্যৱস্থাৰ সিদ্ধান্ত হৈছে৷ য’ত লক্ষণ নথকা ৰোগীসকলক ৰখা হ’ব৷ এই সমগ্র ব্যৱস্থা সন্দর্ভত তেওঁ কয়– ‘বাহিৰৰ পৰা অহা ৰোগীসকলক আমি ৰাখিবও লাগিব আৰু খোৱা–বোৱাৰ ব্যৱস্থাও কৰিব লাগিব৷ সেয়েহে বহিঃৰাজ্যৰ পৰা অহা লোকসকলক ৰাখি উভতি যোৱাৰ সময়ত ৰে’লৰ টিকটৰ ধন দিয়াৰ ব্যৱস্থা কৰা হ’ব৷ অসমত সম্প্রতি আতংকিত হোৱাৰ কোনো কাৰণ নাই৷ দৈনিক ১০ হাজাৰ ৰোগীক ৰাখিব পৰা ব্যৱস্থা বনোৱা আছে৷ এইবাৰ ক’ভিড বেছি ক্ষতিকাৰক হোৱা নাই৷ আগতে ৰোগীক ১০ দিন ৰাখিছিলোঁ৷ এতিয়া ৭ দিনতে ৰোগীক ঘৰলৈ যাবলৈ অনুমতি দিয়া হয়৷ বর্তমান আতংকিত হোৱাৰ কোনো কাৰণ নাই৷ প্রয়োজন হ’লে আমি কথা পাতিম৷ ভালে ভালে বিহু হৈ যাওক, তাৰ পাছত আমি চাম৷’ ইফালে, বর্তমানলৈ ৰাজ্যত ১৬ লাখ লোকে ভেকচিন লৈছে বুলি উল্লেখ কৰি স্বাস্থ্যমন্ত্রীগৰাকীয়্ কয় যে ভেকচিন লোৱাসকলৰ কিছুসংখ্যকে দ্বিতীয় ড’জ লাভ কৰিছে৷ বেছিসংখ্যক আক্রান্ত বিমান অথবা ৰে’লযাত্রী৷ মহানগৰীত অধিক পৰীক্ষা কৰাৰ বাবে আক্রান্তৰ সংখ্যা বৃদ্ধি পাইছে৷ আজি ৭০ হাজাৰ পৰীক্ষাৰ কৰাৰ পাছত ৬০গৰাকী আক্রান্ত পজিটিভ হৈছে৷ এয়া যথেষ্ট বুলি ক’ব পৰা নাযায়৷
পূর্বৰ ক’ভিডৰ সময়ৰ দৰেই এইবাৰ আতংকিত হ’ব নালাগে বুলি উল্লেখ কৰি ড০ শর্মাই কয়– ‘এইবাৰ চিকিৎসক–নার্ছৰ বাবে আমাৰ ভয় নাই৷ সকলোৱে ভেকচিন লাভ কৰিছে৷ পি পি ই কিট, টেষ্টিং কিটৰ দাম যথেষ্ট হ্রাস পাইছে৷ তদুপৰি দেশত এইসমূহ সামগ্রী যথেষ্ট পৰিমাণে উপলব্ধ৷ আই চি ইউ বিছনাৰ অভাৱ নাই৷ সেয়েহে আতংকিত হোৱাৰ কোনো কাৰণ নাই৷ শিক্ষানুষ্ঠান বন্ধ ৰাখিলেও কিমান দিনলৈ শিক্ষানুষ্ঠান বন্ধ কৰি ৰাখিব পৰা যাব৷ ক’ভিড থাকিবই৷ কেন্দ্রীয় চৰকাৰে সময় মতে বিভিন্ন প্রৱেশ পৰীক্ষা অনুষ্ঠিত কৰিব৷ আমি ভয় কৰি থাকিলে অসমৰ শিক্ষার্থীসকলে এই প্রৱেশ পৰীক্ষাসমূহত অৱতীর্ণ হ’ব নোৱাৰিব৷ সেয়েহে শিক্ষকসকলক ভেকচিন প্রদান কৰাৰ ক্ষেত্রত আমি অধিক গুৰুত্ব দিছোঁ৷ অহা কেইমাহমানৰ ভিতৰত ৬–৮টা নতুন ভেকচিন বজাৰলৈ আহিব৷ আমি আৰু কিছুদিন ধৈর্যসহকাৰে অতিক্রম কৰিব লাগিব৷ চিকিৎসক–নার্ছসক প্রশিক্ষিত৷ সেয়েহে ভয় খোৱাৰ কোনো কাৰণ নাই৷ ৪৫ বছৰ ঊর্ধ্বৰ সকলো ব্যক্তিক ভেকচিন ল’বলৈ মই আহ্বান জনাইছোঁ৷ ৰাইজ সাৱধানে থাকক৷ অসুস্থ অনুভৱ কৰিলেই পৰীক্ষা কৰাওক৷ এক লাখকৈ পৰীক্ষা কৰিব পাৰিলে ক’ভিড ৰাজ্যত বিয়পিব নোৱাৰে৷’ আনহাতে, মেট্রিক আৰু উচ্চতৰ মাধ্যমিক চূড়ান্ত পৰীক্ষা ক’ভিডৰ সংক্রমণৰ বাবে সময় মতে অনুষ্ঠিত হ’ব নে নহয়, তাক লৈ শিক্ষার্থীৰ মাজত উদ্বিগ্ণতা সৃষ্টি হৈছে৷ ইয়াৰ মাজতে আজি এই সন্দর্ভত স্বাস্থ্যমন্ত্রীগৰাকীয়্ কয় যে এই পৰীক্ষাসমূহ সময় মতে অনুষ্ঠিত হ’ব৷ পৰীক্ষা নহ’লে শিক্ষার্থীসকলৰ এটা শৈক্ষিক বর্ষ লোকচান হ’ব৷ দুখীয়া পৰিয়ালৰ শিক্ষার্থীসকলে পৰীক্ষা দিব নোৱাৰে৷ সামাজিক দূৰত্ব মানি এই পৰীক্ষাসমূহ অনুষ্ঠিত কৰিবলৈ কোৱা হৈছে৷ মেট্রিক আৰু উচ্চতৰ মাধ্যমিকৰ চূড়ান্ত পৰীক্ষা অনুষ্ঠিত কৰিব নোৱাৰিলে শিক্ষার্থীসকলৰ এটা বছৰ পুনৰ লোকচান হ’ব