🔹 কনচার্ট ফৰ হাৰমনী
🔹 প্রাইড ইষ্ট এণ্টাৰটেইনমেণ্টৰ বর্ণাঢ্য আয়োজন
ষ্টাফ ৰিপ’ৰ্টাৰ, ১৬ ডিচেম্বৰ : প্রাইড ইষ্ট এণ্টাৰটেইনমেণ্ট প্রাইভেট লিমিটেডৰ উদ্যোগত আজি অনুষ্ঠিত হ’ব ‘কনচার্ট ফৰ হাৰমনী’৷ গুৱাহাটীৰ বর্ষাপাৰাস্থিত এচিএ ষ্টেডিয়ামত জনপ্রিয় কণ্ঠশিল্পী অৰিজিত সিঙে সংগীতানুষ্ঠান পৰিৱেশন কৰিব৷ শীতৰ সেমেকা সন্ধিয়া কেইবাটাও ‘হিট’ গান পৰিৱেশন কৰি অৰিজিত সিঙে উমাল কৰি তুলিব৷ ইতিমধ্যে অৰিজিত সিঙৰ সংগীতানুষ্ঠানক লৈ অনুৰাগীৰ মাজত ব্যাপক উছাহ–উদ্দীপনা পৰিলক্ষিত হৈছে৷ উল্লেখ্য যে বলীউডৰ জনপ্রিয় সংগীত শিল্পীসকলৰ অন্যতম হৈছে অৰিজিত৷ এটাৰ পাছত আন এটা হিট গীতেৰে শ্রোতাৰ মনত তেওঁ সুকীয়া স্থান দখল কৰিবলৈ সক্ষম হৈছে৷ যাৰ বাবে প্রিয় সংগীতশিল্পীগৰাকীক এবাৰ ওচৰৰ পৰা চাবলৈ তথা প্রত্যক্ষভাৱে সংগীতানুষ্ঠান উপভোগ কৰিবলৈ প্রতিগৰাকী অনুৰাগীৰ মাজত উৎকণ্ঠা পৰিলক্ষিত হয়৷ ব্যতিক্রম নহয় ৰাজ্যৰ অনুৰাগীসকলো৷ অধীৰ উৎকণ্ঠাৰ অৱসান ঘটাই আজি বর্ষপাৰাত সন্ধিয়া অৰিজিতে পৰিৱেশন কৰিব সংগীতানুষ্ঠান৷ ইতিমধ্যে বর্ষাপাৰা ষ্টেডিয়ামত সংগীতানুষ্ঠানৰ প্রস্তুতি প্রায় সম্পূর্ণ হৈছে৷ প্রাইড ইষ্ট এণ্টাৰটেইনমেণ্টৰ এই বর্ণাঢ্য আয়োজনৰ সকলো দিশ পৰীক্ষা কৰা হৈছে৷ কালি সন্ধিয়া বর্ষাপাৰাত উপস্থিত হৈ প্রস্তুতিপর্ব পৰিদর্শন কৰে প্রাইড ইষ্টৰ অধ্যক্ষ তথা পৰিচালন সঞ্চালক ৰিণিকি ভূঞা শর্মাই৷ তদুপৰি আৰক্ষী–প্রশাসনৰ লোকসকলে বর্ষাপাৰাত উপস্থিত হৈ আজি অনুষ্ঠিত হ’বলগীয়া সংগীতানুষ্ঠান আয়োজনৰ প্রস্তুতিৰ বুজ লয়৷ এই সংগীতানুষ্ঠানৰ অনলাইন টিকট বুক মাই শ্ব’ত উপলব্ধ৷ তদুপৰি নিউজ লাইভ বিল্ডিং, চিটী চেণ্টাৰ, নেহৰু ষ্টেডিয়াম, বর্ষাপাৰা ষ্টেডিয়াম, সৰুসজাই ষ্টেডিয়াম প্রৱেশদ্বাৰত সংগীতানুষ্ঠানৰ অফলাইন টিকট উপলব্ধ৷