📌 প্রসন্ন তুৰুঙৰ হত্যাৰ অভিযোগত অভিযুক্ত প্রদ্যুৎ বৰদলৈ
📌 তেওঁ ব্যর্থ মন্ত্রী, ব্যর্থ বিধায়ক, ব্যর্থ সাংসদ
📌আগন্তুক লোকসভা নির্বাচনত ৯০ হাজাৰ ভোটত পৰাস্ত কৰাৰ হুংকাৰ পীয়ূষ হাজৰিকাৰ
নিয়মীয়া বাৰ্তা ডিজিটেল, ২ এপ্ৰিলঃ আগন্তুক লোকসভা নির্বাচনত প্রদ্যুৎ বৰদলৈক ৯০ হাজাৰ ভোটত পৰাস্ত কৰাৰ হুংকাৰ দিলে মন্ত্রী পীয়ূষ হাজৰিকাই৷ জাগীৰোডৰ জোনবিলস্থিত জাগীভকতগাঁও মণ্ডল বিজেপিৰ কার্যালয়ত কংগ্রেছ সাংসদগৰাকীক তীব্র ভাষাৰে সমালোচনা কৰি পীয়ূষ হাজৰিকাৰ মন্তব্য– প্রদ্যুৎ বৰদলৈৰ বিৰুদ্ধে প্রসন্ন তুৰুঙৰ হত্যাৰ অভিযোগ আছে৷ উল্লেখ্য যে শেহতীয়াকৈ নগাঁও সমষ্টিৰ সাংসদ প্রদ্যুৎ বৰদলৈয়ে পীয়ূষ হাজৰিকাৰ বিৰুদ্ধে একাধিক অভিযোগ আনি সমালোচনা কৰিছিল৷ উক্ত সমালোচনাৰ প্রত্যত্তৰ দি সংবাদ মাধ্যমৰ আগত পীয়ূষ হাজৰিকাই কয়– গঁড় হত্যাৰ বাবে ৰকিবুল হুছেইন যিমান দায়ী, সিমানেই প্রদ্যুৎ বৰদলৈও দায়ী৷ প্রদ্যুৎ বৰদলৈ যেতিয়া শক্তিমন্ত্রী আছিল, নিজ সমষ্টি মার্ঘেৰিটাত হাৰি নগাঁৱলৈ পলাবলৈ বাধ্য হৈছিল৷ শক্তিমন্ত্রী থকাৰ পাছতো প্রদ্যুৎ বৰদলৈৰ সমষ্টিত ইলেক্ট্রিক পোষ্ট নাছিল৷ তাত আছিল বাঁহৰ খুঁটা৷ গতিকে প্রদ্যুৎ বৰদলৈ এগৰাকী ব্যর্থ মন্ত্রী, ব্যর্থ বিধায়ক, ব্যর্থ সাংসদ৷ মন্ত্রী পীয়ূষ হাজৰিকাই ইয়াকো উল্লেখ কৰে যে মার্ঘেৰিটাৰ পৰা আহি মুছলমানৰ ভোটেৰে নগাঁও লোকসভা সমষ্টিৰ সাংসদ হৈ জাগীৰোডত প্রদ্যুৎ বৰদলৈক দাদাদিৰি কৰিবলৈ দিয়া নহ’ব৷ আগন্তুক লোকসভা নির্বাচনত তেওঁক ৯০ হাজাৰ ভোটত পৰাস্ত কৰা হ’ব৷ মন কৰিবলগীয়া যে জাগীৰোড সমষ্টিৰ পশ্চিম মায়ং পঞ্চায়তত ৩০গৰাকী কংগ্রেছ কর্মীয়ে আজি বিজেপিত যোগদান কৰে৷ প্রায় দুমাহ ধৰি বিজেপিত যোগদানৰ বাবে মন্ত্রীগৰাকীৰ সৈতে যোগাযোগত আছিল যদিও বিভিন্ন ব্যস্ততাৰ বাবে মন্ত্রী পীয়ূষ হাজৰিকাই তেওঁলোকক সময় দিব পৰা নাছিল৷ বিজেপিত যোগদানৰ এই অনুষ্ঠানত মন্ত্রী হাজৰিকাই কয় যে বিজেপিত যিসকলে যোগদান কৰিছে, তেওঁলোকে নিজ নিজ অঞ্চলত যথেষ্ট শক্তিশালী৷ কংগ্রেছ দলৰ কাম–কাজত তেওঁলোক অতিষ্ঠ হৈ বিজেপিত যোগদান কৰিছে৷ এই অনুষ্ঠানতে মন্ত্রী পীয়ূষ হাজৰিকাই পুনৰ প্রদ্যুৎ বৰদলৈক সমালোচনা কৰি কয় যে লাহৰীঘাট, ধিং, ৰূপহীহাট, চামগুৰিৰ ভোটেৰে তেওঁ জয়ী হৈছিল যদিও জাগীৰোডত অতি বেয়াকৈ ধৰাশায়ী হৈছিল৷ ৭৭ হাজাৰ ভোটত জাগীৰোডত প্রদ্যুৎ বৰদলৈ হৰাৰ পিছৰে পৰা তেওঁ হিংসা কৰিবলৈ লৈছে৷ সাংসদ বৰদলৈৰ প্রশ্ণ যে তেওঁ কিয় জাগীৰোডত ৭৭ হাজাৰ ভোটত হাৰিল? কিয় জাগীৰোডত কোনো এটা অনুষ্ঠানেও তেওঁক নামাতে? কিয় জাগীৰোডত এহাজাৰ মানুহ লৈ ক’তো এখন মিটিং পাতিব নোৱাৰে৷ কাৰোবাৰ ঘৰত বহি দুই–চাৰিটা মানুহক ফুচুলাই লৈ মিটিং কৰে প্রদ্যুৎ বৰদলৈয়ে৷ তেওঁ নামঘৰৰ মণিকূটৰ পইচা দিম বুলি ফাঁকি মাৰি মানুহবোৰ লৈ গৈ মিটিং পাতে৷ প্রদ্যুৎ বৰদলৈয়ে এনে চক্রান্ত কৰি লাভ নাই৷ আমি ৰাইজৰ কাৰণে কাম কৰিছোঁ, ৰাইজৰ লগত আছোঁ৷ গতিকে আমাক ইয়াত ভগৱানৰ আশীর্বাদত একো কৰিব নোৱাৰে৷ জাগীভকতগাঁও মণ্ডলত অনুষ্ঠিত যোগদান কার্যসূচীত বিজেপিৰ মৰিগাঁও জিলাৰ সভাপতি ৰামপ্রসাদ সৰকাৰ, পশ্চিম মায়ং মণ্ডলৰ সভাপতি চন্দন দাসসহ দলৰ বহুকেইগৰাকী জ্যেষ্ঠ কার্যকর্তাৰ উপস্থিতিত পশ্চিম মণ্ডল যুৱ কংগ্রেছৰ প্রাক্তন সম্পাদক জীৱন তালুকদাৰ, জাগীৰোড সমষ্টিৰ যুৱ কংগ্রেছ কমিটীৰ সাধাৰণ সম্পাদক স্বপন দাস, পশ্চিম মায়ং মণ্ডলৰ কংগ্রেছৰ সাধাৰণ সম্পাদক ফণীধৰ ভূঞাৰ লগতে শতাধিক কংগ্রেছ কর্মীয়ে বিজেপিত যোগদান কৰে৷