আলু–পিঁয়াজৰ মূল্যবৃদ্ধি ৰোধত ব্যর্থ যোগানমন্ত্রী

নিয়মীয়া বাৰ্তা ২৩ ছেপ্টেম্বৰঃ  ৰাজ্যৰ দৰিদ্র আৰু মধ্যবিত্ত পৰিয়ালক মাধমাৰ শোধাই পুনৰ হোৰাহোৰে বাঢ়িছে আলু, পিঁয়াজ আৰু মিঠাতেলৰ দাম৷ যোৱা এসপ্তাহৰ ভিতৰতে ৰাজ্যত আলু আৰু পিঁয়াজৰ ঊর্ধ্বমুখী দামে সাধাৰণ ৰাইজক বিপাঙত পেলোৱাই নহয়, অঞ্চলভেদে বেলেগ বেলেগ দামক লৈও সৃষ্টি হৈছে সমস্যাৰ৷ উল্লেখ্য যে সংসদত অত্যাৱশ্যকীয় সামগ্রী (সংশোধনী) বিধেয়ক গৃহীত হোৱাৰ সময়তে ৰাজ্যত আলু, পিঁয়াজ আৰু মিঠাতেলৰ মূল্য ১০ টকাৰ পৰা ১৫ টকালৈ বৃদ্ধি পাইছে৷ গুৱাহাটীৰ খুচুৰা বজাৰত প্রতিকিলো আলু (আগ্রা) ৪০–৪৫ টকাত বিক্রী হোৱাৰ বিপৰীতে প্রতিকিলো পিঁয়াজ বিক্রী হৈছে ৫০ টকাত৷ আনহাতে, প্রতিলিটাৰ মিঠাতেলৰ দাম ১৩৫–১৪০ টকালৈ বৃদ্ধি হৈছে৷ অভাৱনীয়ভাৱে ঘটা এনে মূল্যবৃদ্ধিক লৈ যোগান বিভাগৰ বিৰুদ্ধে সাধাৰণ ৰাইজ সৰৱ হৈ উঠাৰ সময়তে আজি দিছপুৰত চেম্বার্ছ অৱ কমার্চৰ লগত যোগান মন্ত্রী ফণীভূষণ চৌধুৰী এক গুৰুত্বপূর্ণ বৈঠকত বহে৷ মুখ্যতঃ অত্যাৱশ্যকীয় সামগ্রীৰ হঠাৎ ঊর্ধ্বমুখী দামক লৈ সৃষ্টি হোৱা প্রতিক্রিয়াৰ পৰিপ্রেক্ষিতত অনুষ্ঠিত এই বৈঠকত যোগান মন্ত্রীয়ে চেম্বার্ছ অৱ কমার্চক মূল্যবৃদ্ধি নিয়ন্ত্রণৰ বাবে ব্যৱস্থা গ্রহণৰ আহ্বান জনায়৷ এই সন্দর্ভত যোগান মন্ত্রী ফণীভূষণ চৌধুৰীয়ে জানিবলৈ দিয়া মতে, যোৱা সময়ছোৱাত উৎসতে আলু, পিঁয়াজৰ দাম বৃদ্ধি হোৱা হেতুকে ৰাজ্যতো মূল্যবৃদ্ধি ঘটিছে৷ কিন্তু শেহতীয়াকৈ খুচুৰা বজাৰ আৰু পাইকাৰী বজাৰৰ মূল্যৰ যথেষ্ট পার্থক্য পৰিলক্ষিত হৈছে৷ প্রতিকিলো আলু বা পিঁয়াজৰ পাইকাৰী বজাৰৰ মূল্যতকৈ খুচুৰা বজাৰত পার্থক্য ৬ টকাৰ অধিক হ’ব নোৱাৰে৷ কিন্তু একাংশ ব্যৱসায়ীয়ে খুচুৰা বজাৰত ১০ টকা হাৰত আলু, পিঁয়াজ বিক্রী কৰি আছে৷ এই বিষয়টো চেম্বার্ছ অৱ কমার্চৰ লগত আলোচনা কৰাৰ লগতে অত্যাৱশ্যকীয় সামগ্রীৰ মূল্য এই ধৰণে বৃদ্ধি নকৰিবলৈ সতর্ক কৰি দিয়া হৈছে৷ মূল্যবৃদ্ধিক লৈ কাইলৈ আন এক বৈঠকত যোগান মন্ত্রী মিলিত হ’ব বুলি আজি জানিবলৈ দিয়ে৷ মন কৰিবলগীয়া যে ফাঁচীবজাৰৰ পাইকাৰী বজাৰত প্রতিকুইণ্টল আলু (আগ্রা) ৩,৫০০ টকাত বিক্রী হৈ থকাৰ বিপৰীতে খুচুৰা বজাৰত এই আলু প্রতিকিলোত ৪৫ টকাকৈ বিক্রী কৰিছে দোকানীয়ে৷ একেদৰে পাইকাৰী বজাৰত প্রতিকুইণ্টল পিঁয়াজ ৩,৮০০ টকাকৈ বিক্রী হৈ থকাৰ বিপৰীতে খুচুৰা বজাৰত প্রতিকিলো পিঁয়াজৰ মূল্য ৫০ টকালৈ বৃদ্ধি পাইছে৷ চলিত মাহৰ আৰম্ভণিতে প্রতিকিলো আলু ৩০ টকা আৰু প্রতিকিলো পিঁয়াজ ২৫ টকাকৈ বিক্রী হৈ আছিল৷ কিন্তু যোৱা ১৫ দিনৰ ভিতৰতে আলুৰ মূল্য ১৫ টকাকৈ বৃদ্ধি হোৱাৰ বিপৰীতে পিঁয়াজৰ মূল্য প্রায় ২৫ টকালৈ বৃদ্ধি হৈছে৷ একমাত্র আলু, পিঁয়াজেই নহয়, শেহতীয়াকৈ অভাৱনীয় হাৰত মূল্যবৃদ্ধি ঘটিছে মিঠাতেলৰ৷ খুচুৰা বজাৰত প্রতিলিটাৰ মিঠাতেলৰ পেকেটৰ দাম ১৪০ টকাৰ পৰা ১৪৫ টকালৈ বৃদ্ধি পাইছে৷ এই মূল্য অহা সময়ছোৱাত অধিক হোৱাৰ সম্ভাৱনাই দেখা দিছে৷ উল্লেখ্য যে চলিত মাহৰ আৰম্ভণিতেই ১২০ টকাত বিক্রী হোৱা মিঠাতেল এতিয়া খুচুৰা বজাৰত অনিয়ন্ত্রিতভাৱে মূল্যবৃদ্ধি হোৱাক লৈও আজি দিছপুৰত অনুষ্ঠিত বৈঠকত আলোচনা কৰা হয়৷ একাংশ ব্যৱসায়ীয়ে পৰিস্থিতিৰ সুযোগ লৈ মিঠাতেলৰ দাম বৃদ্ধি কৰাৰ অভিযোগো আজি যোগান মন্ত্রীয়ে চেম্বার্ছ অৱ কমার্চৰ ওচৰত দাঙি ধৰে৷ আলু, পিঁয়াজ আৰু মিঠাতেলৰ এনে ঊর্ধ্বগামী মূল্যই সাধাৰণ ৰাইজক সমস্যাত পেলোৱাই নহয়, গুৱাহাটীৰ বাহিৰৰ কেইবাখনো জিলাত কালিৰে পৰা আলু আৰু পিঁয়াজৰ নাটনি দেখুৱাই ব্যৱসায়ীয়ে মূল্যবৃদ্ধি ঘটোৱাৰো অভিযোগ উত্থাপন হৈছে৷ ডিব্রুগড়, যোৰহাট, তেজপুৰ, ধুবুৰী, লখিমপুৰ আদি জিলাত আজিৰ তাৰিখত প্রতিকিলো আলু–পিঁয়াজ ৫০ টকাকৈ বিক্রী কৰাৰো অভিযোগ উত্থাপন হৈছে৷