বিশেষ বাৰ্তা, ১৯ আগষ্টঃ উত্তৰ প্ৰদেশৰ আমেথি লোকসভাৰ আসনখন কংগ্ৰেছৰ দুৰ্গ হিচাপে গণ্য কৰা হৈছিল আৰু ২০১৯ চনৰ লোকসভা নিৰ্বাচনৰ পূৰ্বে এই আসনৰ পৰাই ৰাহুল গান্ধী সাংসদ আছিল। ২০১৯ চনৰ নিৰ্বাচনত বিজেপি নেত্ৰী তথা কেন্দ্ৰীয় মন্ত্ৰী স্মৃতি ইৰাণী এই আসনৰ পৰা সাংসদ হৈ কংগ্ৰেছৰ দুৰ্গ ভাঙি পেলালে। এতিয়া আকৌ এবাৰ আমেথি আসনৰ পৰা ৰাহুল গান্ধীয়ে প্ৰতিদ্বন্দ্বিতা কৰাক লৈ আলোচনা আৰম্ভ হৈছে। দৰাচলতে উত্তৰ প্ৰদেশ কংগ্ৰেছৰ সভাপতি অজয় ৰায়ে কালি দাবী কৰিছিল যে ২০২৪ চনৰ লোকসভা নিৰ্বাচনত ৰাহুল গান্ধীয়ে আমেথিৰ পৰা প্ৰতিদ্বন্দ্বিতা কৰিব। নেহৰু-গান্ধী পৰিয়ালৰ পৰম্পৰাগত আসনত আকৌ এবাৰ ৰাহুল গান্ধীক গ্ৰাউণ্ড ৰানিং কৰা দেখা যায়। এই আসনৰ পৰা মাত্ৰ দুবাৰকৈ পৰাজয়ৰ সন্মুখীন হৈছে পৰিয়ালটো। প্ৰথমে যেতিয়া সঞ্জয় গান্ধীয়ে জনতা পাৰ্টিৰ প্ৰাৰ্থী ৰবীন্দ্ৰ প্ৰতাপ সিঙৰ হাতত পৰাস্ত হয় আৰু দ্বিতীয়বাৰ বিজেপি প্ৰাৰ্থী স্মৃতি ইৰাণীৰ হাতত পৰাস্ত হয় ৰাহুল গান্ধী। ২০০৪ চনত আমেথি সমষ্টিৰ পৰা সংসদীয় অভিষেক ঘটা ৰাহুল গান্ধীয়ে একেখন আসনৰ পৰা দুটাকৈ লোকসভা নিৰ্বাচনত জয়লাভ কৰাৰ পিছত ২০১৯ চনত বিজেপিৰ স্মৃতি ইৰাণীৰ হাতত পৰাস্ত হয়। বৰ্তমান ৰায়বেৰেলীৰ পৰা তেওঁৰ মাতৃ ছোনিয়া গান্ধী সমগ্ৰ উত্তৰপ্ৰদেশৰ একমাত্ৰ কংগ্ৰেছ সাংসদ। এনে পৰিস্থিতিত কংগ্ৰেছে স্মৃতি ইৰাণীৰ পৰা আমেথি কাঢ়ি নিবলৈ চকু ৰাখিব। বৰ্তমান ৰাহুল গান্ধী কেৰালাৰ ৱায়ানাডৰ সাংসদ। এই আলোচনাই শক্তি লাভ কৰিলে যেতিয়া উত্তৰপ্ৰদেশ কংগ্ৰেছৰ সভাপতি অজয় ৰায়ে সাংবাদিকৰ আগত কয়, “ৰাহুল গান্ধীয়ে নিশ্চিতভাৱে আমেথিৰ পৰা প্ৰতিদ্বন্দ্বিতা কৰিব, আমেথিৰ জনসাধাৰণ ৰাহুলৰ লগত আছে।” আনহাতে, যোৱা নিৰ্বাচনত ৰাহুল গান্ধীক পৰাজয়ৰ সোৱাদ দিয়া স্মৃতি ইৰাণীৰ বিষয়ে সোধাত তেওঁ কয় যে তেওঁক হতাশ যেন লাগিছে। হিন্দুস্তান টাইমছৰ প্ৰতিবেদন অনুসৰি অঞ্চলটোত স্মৃতি ইৰাণীৰ সক্ৰিয় ভূমিকাই বিজেপিৰ উপস্থিতি অধিক শক্তিশালী কৰি তুলিছে। আমেথি লোকসভাৰ আসনত ইৰানীৰ সমৰ্থকসকলে কেন্দ্ৰীয় আৰু ৰাজ্য চৰকাৰ উভয়ে কৰা উন্নয়নমূলক কামৰ কথা কোৱা দেখা গৈছে। একে সময়তে ২০১৯ চনৰ নিৰ্বাচনত পৰাজয়ৰ পিছত ৰাহুল গান্ধীয়ে তিনিবাৰকৈ আমেথি ভ্ৰমণ কৰি সমষ্টিটোৰ পৰা পুনৰ প্ৰতিদ্বন্দ্বিতা কৰাৰ সম্ভাৱনাই স্থানীয় দলীয় নেতাসকলৰ আশা জীয়াই ৰাখিছে। বিশেষকৈ Covid-19 মহামাৰীৰ সময়ত গান্ধীয়ে আমেথিত দৃশ্যমান উপস্থিতি বজাই ৰাখিছে যেতিয়া তেওঁ অঞ্চলটোলৈ সাহায্য সামগ্ৰী প্ৰেৰণ কৰিছিল। তেওঁৰ এই প্ৰচেষ্টাই স্থানীয় দলীয় কৰ্মীসকলৰ ওপৰত ইতিবাচক প্ৰভাৱ পেলাইছে।