নিয়মীয়া বাৰ্তা ডিজিটেল, ৩ এপ্ৰিলঃ ৰঙালী বিহুৰ প্রাক্ক্ষণত ৰাজ্যবাসীলৈ এক সুখবৰ, অসমৰ চহকী সংস্কৃতিৰ ঐতিহ্যবাহক অসমীয়া গহনাক ভৌগোলিক সূচাংক (জি আই) স্বীকৃতি প্রদান কৰা হৈছে৷ বৌদ্ধিক সম্পদ কার্যালয়ৰ অধীনত ভৌগোলিক সুচাংক পঞ্জীয়কে পৰম্পৰাগত অসমীয়া গহনাক জি আই স্বীকৃতি প্রদান কৰাৰ কথা আনুষ্ঠানিকভাৱে ঘোষণা কৰিছে৷ এই স্বীকৃতিৰ বাবে অসম বিজ্ঞান–প্রযুক্তি আৰু পৰিৱেশ পৰিষদৰ সহযোগিতাত অসমৰত্ন আৰু গহনা সংবর্ধন পৰিষদে আবেদন দাখিল কৰিছিল৷ আবেদনখনৰ ভিত্তিত সকলো দিশ চালি–জাৰি চাই ভৌগোলিক সূচাংক পঞ্জীয়কে থলুৱা অসমীয়া গহনাক জি আই স্বীকৃতি প্রদান কৰে৷ স্বাভাৱিকতে এই খবৰে সমগ্র ৰাজ্যবাসীক আনন্দিত কৰি তুলিছে৷ কিয়নো অসমীয়া জাতিৰ ঐতিহ্য–সংস্কৃতিৰ এক এৰাব নোৱাৰা উপাদান হৈছে অসমীয়া গহনা৷ বিশেষকৈ বিহু নৃত্য পৰিৱেশনৰ সময়ত নাচনীসকলে মুগাৰ মেখেলা–চাদৰৰ লগত পৰম্পৰাগত অসমীয়া গহনা পৰিধান কৰে৷ কেৱল বিহুৱতীসকলেই নহয়, প্রতিগৰাকী অসমীয়া নাৰীৰেই অসমীয়া গহনাৰ বাবে আছে সুকীয়া দুর্বলতা৷ বিভিন্ন ডিজাইনৰ অসমীয়া গহনাসমূহৰ ভিতৰত জোনবিৰি, ডুগডুগী, গামখাৰু, লোকাপাৰ, জেঠীপটা, কেৰু, যুৰীয়া, জাংফাট, দীঘল কেৰু, বেনা, গেজেৰা, বিৰি মণি, পোৱাল মণি আদি অন্যতম৷ এই স্বীকৃতিৰ পাছতে অসমীয়া গহনা উদ্যোগৰ সৈতে জড়িত অটাইলৈ তথা অসমবাসীলৈ আন্তৰিক অভিনন্দন জ্ঞাপন কৰিছে মুখ্যমন্ত্রী ড০ হিমন্ত বিশ্ব শর্মাই৷ শিল্পীসকলৰ সুৰক্ষা আৰু স্বীকৃতিৰ প্রতি লক্ষ্য ৰাখি ২০১৮–১৯ বর্ষৰ বাজেটত এই প্রস্তাৱ গ্রহণ কৰাৰ কথা উল্লেখ কৰি মুখ্যমন্ত্রী ড০ শর্মাই কয় – ‘অসমলৈ এক সুখৰ বতৰা কঢ়িয়াই আনিছে অসমীয়া গহনাই৷ আমাৰ ঐতিহ্য–সংস্কৃতিৰ সৈতে অংগাংগীভাৱে জড়িত অসমীয়া গহনাক প্রদান কৰা হৈছে ভৌগোলিক সূচাংক অর্থাৎ জি আই টেগৰ স্বীকৃতি৷ মোৰ আজিও মনত আছে ২০১৮–১৯ বর্ষৰ বাজেট উত্থাপনত আমাৰ শিল্পীসকলৰ সুৰক্ষা আৰু স্বীকৃতিৰ প্রতি লক্ষ্য ৰাখি ইয়াৰ বাবে আমি প্রস্তাৱ গ্রহণ কৰিছিলোঁ৷ আমাৰ এই প্রস্তাৱে আজি ন্যায্যতা পোৱাত সুখী অনুভৱ কৰিছোঁ৷’ উল্লেখ্য যে সাধাৰণতে কেঁচা সোণ নামৰ সামগ্রীৰে অসমীয়া গহনাসমূহ তৈয়াৰ কৰা হয়৷ সচৰাচৰ অসমীয়া গহনা হাতেৰে নির্মাণ কৰা হয়৷ ইয়াৰ ডিজাইন বা ৰূপাংকনসমূহ এই অঞ্চলটোৰ মহামূল্যৱান গছ–গছনি আৰু জীৱ–জন্তুৰ ৰূপ দর্শায়৷ পৰম্পৰাগত অসমীয়া গহনাসমূহ জিৱাল ৰঙা পাথৰ, ৰুবী বা মিনাৰেৰে সজোৱা হয়৷