নিয়মীয়া বাৰ্তা, ৩১ মেঃ ক’ভিড-১৯ ৰ দৰে মহামাৰীৰ সংক্ৰমণ প্ৰতিৰোধৰ বাবে কেন্দ্ৰ আৰু ৰাজ্য চৰকাৰে ঘোষণা কৰা দীঘলীয়া লকডাউনৰ ফলত আন বহু লোকৰ দৰে সংবাদকৰ্মীসকলো যথেষ্ট সমস্যাৰ সন্মুখীন হোৱাৰ লগতে দিনে-নিশাই আৰক্ষী প্ৰশাসনৰ সমান্তৰালভাৱে ক’ভিড-১৯ ৰ বিৰুদ্ধে যুঁজ দি আহিছে ।
এনে সময়তে সংবাদকৰ্মীসকলক উৎসাহ দিয়াৰ উদ্দেশ্যে আজি বন্ধন বেংকৰ বোকাজান শাখাৰ তৰফৰ পৰা চেনিটাইজাৰ আৰু মাস্ক বিতৰণ কৰে । তদুপলক্ষে আয়োজিত এক অনুষ্টুপীয়া অনুষ্ঠানত বোকাজান প্ৰেছ ক্লাবৰ সভাপতি প্ৰকাশ গগৈ আৰু সম্পাদক ৰুবুল দিহিঙীয়াৰ হাতত বন্ধন বেংকৰ এৰিয়া মেনেজাৰ জয়ন্ত শইকীয়াই চেনিটাইজাৰ আৰু মাস্কৰ টোপোলা অৰ্পন কৰে ।
এই অনুষ্ঠানত বোকাজান প্ৰেছ ক্লাবৰ সভাপতি প্ৰকাশ গগৈয়ে বন্ধন বেংকৰ এৰিয়া মেনেজাৰ জয়ন্ত শইকীয়াসহ বন্ধন বেংকৰ আন সদস্যসকলক কৃতজ্ঞতা জনাই কয় যে- আমি সকলোৱে এইদৰেই মিলিজুলি মহামাৰী ক’ৰোনাক প্ৰতিহত কৰিব লাগিব ।
উল্লেখ্য যে, আজিৰ এই অনুষ্ঠানত বোকাজান প্ৰেছ ক্লাবৰ সভাপতি-সম্পাদকৰ লগতে বহুকেইজন সাংবাদিক উপস্থিত থাকে ।