নিয়মীয়া বাৰ্তা ১৩ আগষ্টঃ অসম আৰক্ষীৰ উপ–পৰিদর্শক (এছ আই) নিযুক্তি কেলেংকাৰিৰ মূল অভিযুক্ত পি কে দত্ত, সঞ্জীত কৃষ্ণসহ পাঁচ অভিযুক্তক কাৰাগাৰত জেৰা কৰিব এনফ’চমেণ্ট সঞ্চালক (ই ডি)এ৷ কাৰাগাৰৰ ভিতৰতে এছ আই কেলেংকাৰিৰ অভিযুক্তকেইজনক জেৰা কৰাৰ বাবে ই ডিক অনুমতি প্রদান কৰিছে বিশেষ ন্যায়াধীশৰ আদালতে৷ উল্লেখ্য যে অসম আৰক্ষীৰ উপ–পৰিদর্শক নিযুক্তিৰ বাবে অনুষ্ঠিত কৰা পৰীক্ষাৰ প্রশ্ণকাকত ফাদিলকে ধৰি গুৰুতৰ বিসংগতি সংঘটিত হোৱাৰ অভিযোগ উত্থাপন হৈছিল৷
নিযুক্তি পৰীক্ষাৰ প্রাক্ক্ষণত একাংশ প্রার্থীয়ে প্রশ্ণকাকত লাভ কৰাৰ তথ্য ফাদিল হোৱাৰ লগে লগে ৰাজ্যজুৰি ব্যাপক প্রতিক্রিয়া সৃষ্টি হয়৷ লগে লগে তদানীন্তন সর্বানন্দ সোণোৱাল চৰকাৰে সমগ্র কেলেংকাৰিটোৰ এক তদন্ত ঘোষণা কৰে৷ এই তদন্তত অৱসৰপ্রাপ্ত ডিআইজি পি কে দত্ত, নিলম্বিত আৰক্ষী অধীক্ষক কুমাৰ সঞ্জীত কৃষ্ণকে ধৰি বহুসংখ্যক লোক জড়িত থকাৰ তথ্য পোহৰলৈ আহে৷
ইতিমধ্যে এই গোচৰত তদন্তকাৰী আৰক্ষীয়ে চার্জশ্বীত দাখিল কৰিছে৷ ইয়াৰ মাজতে পি কে দত্ত, কুমাৰ সঞ্জীত কৃষ্ণসহ আন একাংশ অভিযুক্তক জেৰা কৰিবলৈ বিশেষ আদালতত আবেদন দাখিল কৰে ই ডিয়ে৷ আদালতে ই ডিৰ এই আবেদন মঞ্জুৰ কৰিছে৷ পি কে দত্ত, সঞ্জীত কৃষ্ণৰ উপৰি ই ডিয়ে কাৰাগাৰত জেৰা কৰিব ৰূপম দাস, শৰৎ শর্মা আৰু ৰুবুল হাজৰিকাক৷ শৰৎ শর্মা আৰু ৰুবুল হাজৰিকা সম্প্রতি গোৱালপাৰা কাৰাগাৰত বন্দী হৈ আছে৷