নিয়মীয়া বাৰ্তা, ২০ ফেব্ৰুৱাৰী : চাহ বাগিচাত কৰ্মৰত শ্ৰমিকসকলৰ থকা ভেটিৰ এবিঘা মাটিৰ পট্টা দিয়া, শ্ৰমিকৰ মজুৰি বৃদ্ধি, গ্ৰেচুইটি প্ৰদান, উন্নত চিকিৎসা সেৱাৰ দিহা কৰা আদি বিভিন্ন দাবীত আজি পুৱাই গোৱালপাৰাৰ শিমলীতোলা শশী কুঃ চাহ বাগিচাত বাগিচাখনৰ শ্ৰমিক-মজদুৰ সংগঠনে উত্তাল প্ৰতিবাদ সাব্যস্ত কৰে | পুৱাতেই কাৰখানাৰ সন্মুখত প্ৰতিবাদমুখৰ হয় বাগিচাখনৰ শতাধিক শ্ৰমিক-মজদুৰ | চাহ শ্ৰমিকসকলৰ বস্তি মাটিৰ এক বিঘাকৈ পট্টা দিয়া, বৰ্তমানৰ ২৫০ টকাৰ ঠাইত ৩৫১ টকালৈ মজুৰি বৃদ্ধি কৰা, চিকিৎসাৰ উন্নত সুবিধা প্ৰদান, গ্ৰেচুইটিৰ সুবিধা আৰু শ্ৰমিকৰ প্ৰতিটো সমস্যা সমাধানৰ দাবীত সাব্যস্ত কৰে এই প্ৰতিবাদ |চৰকাৰৰ বিৰুদ্ধে শ্ৰমিকৰ বিভিন্ন প্ৰতিবাদী শ্ল’গানত উত্তাল হয় পৰিৱেশ। আনহাতে লোকসভা নিৰ্বাচনৰ পূৰ্বে দাবীসমূহ চৰকাৰে মানি নল’লে অধিক আন্দোলনমুখী হোৱাৰো হুংকাৰ দিয়ে শ্ৰমিক সংগঠনটিয়ে | সংগঠনটিৰ সম্পাদক পাছকেল বাঘলাই চৰকাৰক শীঘ্ৰে উল্লেখিত দাবীসমূহ পূৰণ কৰিবলৈ প্ৰতিবাদথলীৰ পৰাই সকলোৰে এই দাবী জনায় |
প্ৰেৰক সঞ্জীৱ কুমাৰ দাস