🔴 সংগীত পৰিৱেশন কৰিব তৰালি শর্মা–জুবিন গার্গ-নীল আকাশ–প্রবীণ বৰা–ঋত্বিষা শর্মা, বলীউডৰ শিল্পীয়ে
নিয়মীয়া বাৰ্তা ডিজিটেল, ৩ এপ্ৰিলঃ অহা ৪, ৫ আৰু ৬ এপ্রিলত গুৱাহাটী খানাপাৰাস্থিত পশু চিকিৎসা মহাবিদ্যালয় খেলপথাৰত অনুষ্ঠিত হয় অসমৰ সর্ববৃহৎ সংগঠিত অনুষ্ঠান ৰঙালীৰ নৱম সংস্কৰণ৷ ২০১৫ চনত আৰম্ভ কৰা ৰঙালী সৃষ্টিশীলতা, সাংস্কৃতিক সমন্বয় আৰু থলুৱা উদ্যমিতাৰ মহাসমাৰোহলৈ পৰিণত হৈছে৷ অসমৰ নানা জাতি–জনগোষ্ঠীৰ বৈচিত্র্যময় সংস্কৃতিৰ প্রসাৰ আৰু পর্যটনৰ বিকাশত গুৰুত্ব দিয়া ৰঙালীয়ে অসমীয়া মানুহৰ কলাসুলভ চিন্তাক প্রতিনিধিত্ব কৰে৷ শান্তনু হাজৰিকাৰ দৰে বর্তমান বিশ্বজুৰি প্রসিদ্ধ চিত্রশিল্পী, সংযুক্তা দত্তৰ দৰে বস্ত্র ডিজাইনাৰ, প্রবীণ বৰাকে ধৰি বহু অসমীয়া শিল্পী, উদ্যমী, ফেশ্বন ডিজাইনাৰ ৰঙালীৰ মঞ্চতেই জন্ম আৰু বিকাশ হ’ল৷ বৰ অসমৰ ধাৰণাৰে বৃহৎ অসমখনৰ সাংস্কৃতিক ঐতিহ্যক প্রতিনিধিত্ব কৰা ৰঙালীৰ মুখ্য উদ্দেশ্য৷ এইবাৰৰ ৰঙালীৰ বিশেষ সংযোজন ৰঙালী বিশেষ বঁটা৷ অসমৰ সাহিত্য–সংস্কৃতি জগতৰ বহুকেইজন স্বনামধন্য ব্যক্তিক ৰঙালীৰ মঞ্চত বিশেষভাৱে সন্মান জনোৱা হ’ব৷ অসমীয়া উদ্যমিতাৰ বিকাশত গুৰুত্ব দি ৰঙালীত মাছ, কণীৰ পৰা থলুৱা হস্তশিল্প–ভাস্কর্যক্ ধৰি এক বৃহৎ প্রদর্শনীৰ আয়োজন কৰা হৈছে৷ প্রতিবছৰে আয়োজিত ভকেল ফৰ লকেল প্রদর্শনীত ২০০খন বিপণীৰে অসমীয়া মানুহে ক্রয় কৰিব পৰা সকলো সামগ্রীৰ থলুৱা বজাৰ সৃষ্টি ৰঙালীৰ প্রয়াস৷ অসমীয়া মানুহৰ সৃষ্টিশীল মনটোক প্রতিফলন কৰা ৰঙালীৰ অন্যতম সম্পদ বৈচিত্র্যময় সংগীত৷ এইবাৰো অসম তথা উত্তৰ–পূবৰ লগতে বলীউডৰ বহুকেইজন শিল্পীয়ে ৰঙালীৰ মঞ্চত সংগীত পৰিৱেশন কৰিব৷ অসমীয়া খাদ্য আকর্ষণীয়ভাৱে উপস্থাপন কৰাৰ প্রচেষ্টাৰে থলুৱা খাদ্য প্রতিযোগিতাৰ লগতে ৰঙালীত থাকিব মাল্টিকুইজিনৰ সমাহাৰ৷ নতুন প্রজন্মৰ বাবে আর্ট, নৃত্য, গীতৰ এখন মঞ্চ দিয়াৰ লক্ষ্যৰে সকলোখিনি সমল লৈ সকলো প্রজন্মৰ মানুহক ৰঙালীলৈ আনিবলৈ চেষ্টা কৰি অহা হৈছে৷ ৰঙালীয়ে আৰম্ভণিৰে পৰা লোকশিল্পৰ প্রচাৰ–প্রসাৰত গুৰুত্ব দি অসমৰ খিলঞ্জীয়া জাতি–জনগোষ্ঠীৰ সংস্কৃতিৰ বৃহৎ প্রদর্শন কৰি আহিছে৷ এইবাৰো প্রায় ১০০০ থলুৱা শিল্পীৰ সমন্বয়ত অসমৰ সাংস্কৃতিক বৈভৱৰ বৃহৎ পৰিৱেশন হ’ব৷ হস্তশিল্পৰ প্রসাৰৰ লক্ষ্যৰে বৃহৎ ফেশ্বন শ্ব’ৰ লগতে থাকিব সৃষ্টিশীলতাৰ মঞ্চ আর্ট আৰু হিপ হপ ভিলেজ৷ প্রতিবছৰৰ দৰে এইবাৰো ৰঙালীলৈ লক্ষাধিক লোকৰ আগমন হ’ব বুলি আশা কৰা হৈছে৷ এক সংবাদ মেলত মুখ্য আয়োজক শ্যামকানু মহন্তই কয় বহুতো ঘাত–প্রতিঘাতৰ মাজেৰে ২০১৫ চনত আৰম্ভ হৈছিল ৰঙৰ আলি ৰঙালী৷ বিগত সময়ছোৱাত সংবাদ মাধ্যম, চৰকাৰী বিষয়া বা সংস্কৃতি জগতকে ধৰি বৃহৎসংখ্যক ব্যক্তি ৰঙালীৰ অংগ হৈ পৰিল৷ এইখিনিতে এটা কথা কম যে বিগত কেহটামান বর্ষত ৰঙালীত বৃহৎ লোকচান ভৰি প্রত্যাহ্বানৰ মাজতো ৰঙালীৰ প্রৱেশ বিনামূলীয়া কৰি ৰাখিছো৷ যাতে সমাজৰ সকলো শ্রেণীৰ লোক ৰঙালীলৈ আহিব পাৰে৷ দীর্ঘম্যাদীভাৱে ৰঙালীয়ে ইতিবাচক দিশলৈ গতি কৰিব বুলি আমি আশাবাদী৷ আটাইতকৈ ভাল লগা কথা অসমৰ নতুন চামৰ মাজত ৰঙালী অতি জনপ্রিয় হৈছে৷ ৰঙালীৰ ধাৰণাক তেওঁলোকে আঁকোৱালি লৈছে৷ অসমীয়া সংগীতেই যে হাজাৰ হাজাৰ দর্শকক টানিব পাৰে আমি সেয়া দেখুৱাবলৈ প্রয়াস কৰিছো৷ তৰালি শর্মা, জুবিন গার্গ, নীল আকাশ, প্রবীণ বৰা, ঋতৃষা শর্মা, অৰূপজ্যোতি বৰুৱাৰ দৰে থলুৱা অসমীয়া শিল্পীয়ে দেশৰ জনপ্রিয় হিপ হপ শিল্পী বলীডডৰ শিল্পীৰ লগত পৰিৱেশন কৰিব৷ ৰঙালী সমন্বয়ৰ এক ৰঙীন কেনভাছ৷ য’ত সকলো মিলি অসমৰ এখন চিত্র আঁকিবলৈ প্রয়াস কৰিছো৷