🔹 স্থানীয় বহু যুৱক-যুৱতীকো দিছে কৰ্মসংস্থাপন
নিয়মীয়া বাৰ্তা, ১৯ মে’ : যি সময়ত সংস্থাপনৰ বাবে ৰাজ্যৰ বহু শিক্ষিত নিবনুৱা যুৱক-যুৱতীয়ে বহিঃৰাজ্যলৈ ঢাপলি মেলিছে, তেনে সময়তে জোনাই মহকুমাৰ অন্তৰ্গত ১নং ৰাজাখানা গাঁৱৰ চিতাৰাম ছেত্ৰী নামৰ এজন যুৱকে নিজা কেইবাবিঘা ভূমিত পাচলি খেতিৰে কৰিছে সেউজ বিপ্লৱৰ সূচনা ৷ চৰকাৰৰ পৰা কোনোধৰণৰ অনুদান নোলোৱাকৈ অতি সাহসিকতাৰে নিজা ঘৰৰ কাষতে থকা প্ৰায় ৫ বিঘা ভূমিত সম্পূৰ্ণ জৈৱিক পদ্ধতিৰে ইস্কচ, জিকা, ভাতকেৰেলা, ভেণ্ডি, দাংবডি, কোমোৰা, পাণ আদিৰ খেতি কৰি মাত্ৰ কেইটামান মাহৰ ভিতৰতে ভাল ফল লাভ কৰিবলৈ সক্ষম হোৱা বুলি জানিবলৈ দিয়ে চিতাৰাম ছেত্ৰীয়ে৷ ইফালে, খেতিৰ জৰিয়তে চিতাৰাম ছেত্ৰীয়ে নিজে স্বাৱলম্বী হোৱাৰ উপৰি এই খেতিৰ জৰিয়তে কৰ্ম সংস্থাপন দিবলৈ সক্ষম হৈছে স্থানীয় বহু যুৱক-যুৱতীক৷ জানিব পৰা মতে, সম্পূৰ্ণ জৈৱিক পদ্ধতিৰে চিতাৰাম ছেত্ৰীয়ে কৰা খেতিৰ পাচলি জোনাইৰ লগতে চুবুৰীয়া ৰাজ্য অৰুণাচল প্ৰদেশৰ বিভিন্ন ঠাইলৈ প্ৰেৰণ কৰি অধিক লাভান্বিত হৈছে৷ সেয়ে এনে খেতিৰ জৰিয়তে চিতাৰামে ভাল ফল পোৱাত নতুন প্ৰজন্মকো কৰ্ম সংস্থাপনৰ বাবে বহিঃৰাজ্যলৈ গৈ সময় নষ্ট নকৰি নিজৰ ঘৰতে কৃষিকৰ্মত মনোনিৱেশ কৰিবলৈ আহ্বান জনায়।
প্ৰেৰক কৰবী দলে