বিশেষ বাৰ্তা, ১২ জানুৱাৰী : দেৰগাঁৱৰ পাছত এইবাৰ কলিয়াবৰত সংঘটিত হৈছে এক ভয়ংকৰ পথ দুৰ্ঘটনা। নিশা কলিয়াবৰৰ ৰৌমাৰীত সংঘটিত হয় ভয়ংকৰ দুৰ্ঘটনাটো। দুৰ্ঘটনাত নিহত হয় একেখন গাঁৱৰে তিনিজন সুঠাম যুৱক। নিশা নিয়ন্ত্ৰণ হেৰুৱাই চাৰিলেনযুক্ত পথৰ পৰা দ খাৱৈত বাগৰি পৰে AS-12J-6909 নম্বৰৰ mahindra VARITO বাহন । ফলত থিতাতে প্ৰাণহানি হয় অৰ্জুন তাঁতী, অমৃত বিশ্বাস ওৰফে চানুৰ। আনজন ৰাহুল বিশ্বাসক সংকটজনক অৱস্থাত তেজপুৰ মেডিকেল কলেজলৈ প্ৰেৰণ কৰিছিল যদিও আদবাটতে মৃত্যুক সাবটি লয়। বাহনখনত চাৰিজন যুৱক আছিল। বাহনখন কলিয়াবৰৰ দিশৰ পৰা মিছা দিশে গৈ থকা অৱস্থাত নিয়ন্ত্ৰণ হেৰুৱাই দুৰ্ঘটনাটো সংঘটিত হয়। অৱশ্যে বাহনখনৰ চালকজন বৰ্তমানলৈ পলাতক হৈ আছে। যুৱককেইজন ৰৌমাৰীৰ পিংক চিটী হোটেলৰ পৰা ওলাই গৈ উক্ত দুৰ্ঘটনাটোত পতিত হোৱা বুলি জানিব পৰা গৈছে। ঘন কুঁৱলীৰ বাবেই দুৰ্ঘটনাটো সংঘটিত হোৱাৰ আশংকা কৰা হৈছে যদিও প্ৰকৃত কাৰণ এতিয়াও পোহৰলৈ অহা নাই। আনহাতে, মিছা আৰক্ষীয়ে নিশাই দুৰ্ঘটনাস্থলীত উপস্থিত হৈ যুৱককেইজনক উদ্ধাৰ কৰাৰ লগতে ঘটনাৰ তদন্ত অব্যাহত ৰাখিছে। যুৱককেইজনৰ মৃত্যুত কলিয়াবৰৰ মিছা কলবস্তিৰ লগতে সমগ্ৰ অঞ্চলত শোকৰ ছাঁ পৰিছে।
প্ৰেৰক কনক হাজৰিকা