নিয়মীয়া বাৰ্তা, ৬ মাৰ্চঃ দিখৌমুখ নকটানী কালুগাঁও নিৱাসী তথা শিক্ষাবিদ অৱসৰপ্ৰাপ্ত প্ৰধান শিক্ষক ৰবীন নেওগ আৰু অৱসৰপ্ৰাপ্ত শিক্ষয়িত্ৰী ক্ষীৰদা নেওগৰ কন্যা কৰ্মসূত্ৰে বৰ্তমান আমেৰিকা যুক্তৰাষ্ট্ৰৰ চিকাগো চহৰৰ বাসিন্দা তৃষ্ণালী নেওগলৈ ডিজিটেল মিডিয়া মঞ্চ আছাম ফ্লাছৰ তৰফৰ পৰা আন্তৰাষ্ট্ৰীয় প্ৰেক্ষাপটৰ বাতৰি সম্প্ৰচাৰ আৰু সামাজিক ক্ষেত্ৰত আগবঢ়োৱা অৱদানৰ বাবে “আছাম ফ্লাচ শ্ৰেষ্ঠ প্ৰবাসী অসমীয়া ২০২৪” সন্মান প্ৰদান কৰে। উল্লেখযোগ্য যে নিউজ টাইম অসম নামৰ বৈদ্যুতিন মাধ্যমত সক্ৰিয় সাংবাদিক হিচাপে কৰ্মৰত অৱস্থাতে ২০১৩-১৪ বৰ্ষত নেবক’ছ মিডিয়া এৱাৰ্ড লাভ কৰা তৃষ্ণালী নেওগে নামৰূপৰ বাসিন্দা স্বামী পংকজ ভূঞাৰ কৰ্মসূত্ৰে আমেৰিকা যুক্তৰাষ্ট্ৰত থাকি অসমীয়া সংবাদ মাধ্যমেৰে জড়িত হৈ আহিছে। যোৱা ২ মাৰ্চত অসমৰ ডিজিটেল মিডিয়া ফ’ৰাম আছাম ফ্লাচৰ উদ্যোগত যোৰহাট থিয়েটাৰ হলত অনুষ্ঠিত আছাম ফ্লাচ হট উইন্টাৰ-২০২৪ শীৰ্ষক এক গাম্ভীৰ্য্যপূৰ্ণ অনুষ্ঠানত তৃষ্ণালীৰ হৈ পিতৃ ৰবীন নেওগে আছাম ফ্লাচ কৰ্তৃপক্ষৰ পৰা এই সন্মান গ্ৰহণ কৰে। তৃষ্ণালীৰ এই সন্মান প্ৰাপ্তিত জন্মস্থান দিখৌমুখৰ সচেতন মহলে সন্তুষ্টি প্ৰকাশ কৰাৰ লগতে তৃষ্ণালীলৈ অভিনন্দন জনাইছে।
প্ৰেৰক মৃগাংক হাজৰিকা