নিয়মীয়া বাৰ্তা, ১৬ অক্টোবৰ : কামৰূপ জিলাৰ বকো আৰক্ষী থানাৰ অন্তৰ্গত আলোকজাৰীত সংঘটিত হয় এক মৰ্মান্তিক ঘটনা ৷ মৌৰ কামোৰত কৰুণ মৃত্যুক আঁকোৱালি লয় এজন যুৱকে ৷ মৌৰ কামোৰত থিতাতে নিহত হোৱা যুৱকজন ছমৰীয়া আৰক্ষী চকীৰ অন্তৰ্গত ত্ৰিলোচন গাঁৱৰ প্ৰদীপ বিশ্বাস (৪০) বুলি জানিব পৰা গৈছে । প্ৰাপ্ত বাতৰি মতে, প্ৰদীপ বিশ্বাসে নিজ ঘৰৰ পৰা বাইকেৰে বকোৰ দিশত আহি থকা অৱস্থাত আলোকজাৰীত দুৰ্ভাগ্যবশতঃ গছৰ পৰা মৌ বাহ তেওঁৰ ওপৰত সৰি পৰে । পিছত লগে লগে অসংখ্য মৌ মাখিয়ে আক্ৰমণ কৰে যুৱকজনক । ততাতৈয়াকৈ যুৱকজনক বকো প্ৰাথমিক স্বাস্থ্যকেন্দ্ৰত ভৰ্তি কৰায় যদিও চিকিৎসকে মৃত ঘোষণা কৰে । উল্লেখ্য যে মৌ মাখিৰ কামোৰত অতি মৰ্মান্তিকভাৱে যুৱকজনৰ মৃত্যু হোৱা এই ঘটনাটোৱে শোকৰ ছাঁ পেলাইছে সমগ্ৰ ত্ৰিলোচন অঞ্চলত ৷
প্ৰেৰক প্ৰীতম বায়ন