নিয়মীয়া বাৰ্তা, ১৯ ছেপ্টেম্বৰঃ ক’ভিড অতিমাৰীৰ পাছত দেশত অর্থনৈতিক কাম–কাজে পুনৰ জীৱন লাভ কৰাৰ সম্ভাৱনা প্রকট হৈ পৰিছে৷ কেন্দ্রীয় বিত্ত মন্ত্রালয়ে উল্লেখ কৰা অনুসৰি মুঠ প্রত্যক্ষ কৰ সংগ্রহ ৩০ শতাংশ বৃদ্ধি পাইছে৷ অর্থাৎ ১৭ ছেপ্ঢেম্বৰলৈ চলিত বিত্তীয় বর্ষটোত প্রত্যক্ষ কৰ সংগ্রহ হৈছে ৮.৩৬ লাখ কোটি টকা৷ কর্প’ৰেট আৰু ব্যক্তিগত কৰ সংগ্রহৰ এই বৃদ্ধিয়ে দেশৰ অর্থনৈতিক সমৃদ্ধিৰ ইংগিত বহন কৰা বুলিও বিত্ত মন্ত্রালয়ৰ তৰফৰ পৰা ঘোষণা কৰা হৈছে৷
উল্লেখনীয় যে কৰ সংগ্রহ ব্যৱস্থা পূর্বৰ তুলনাত যথেষ্ট উন্নত হোৱা বুলিও বিত্ত মন্ত্রালয়ৰ প্রতিবেদনত উল্লেখ কৰা হৈছে৷ কেন্দ্রীয় চৰকাৰৰ সুস্থিৰ নীতিৰ বাবে প্রত্যক্ষ কৰ সংগ্রহ বৃদ্ধি পোৱা বুলি দাবীও কৰা হৈছে এই প্রতিবেদনত৷ লক্ষণীয়ভাৱে কৰ সংগ্রহৰ ক্ষেত্রত প্রযুক্তিৰ সঠিক ব্যৱহাৰে কৰদাতাসকলকো উপকৃত কৰা বুলি ঘোষণা কৰি আহিছে কেন্দ্রীয় চৰকাৰে৷
উল্লেখনীয় যে প্রত্যক্ষ কৰৰ ভিতৰত আছে কর্প’ৰেটৰ আয়কৰ, ব্যক্তিগত আয়কৰ তথা ছিকিৰিউটিজ ট্রেনজেকচন টেক্স (এছ টি টি)৷ ইয়াৰ ভিতৰত কর্প’ৰেটৰ পৰা সংগ্রহ কৰা হৈছে ৩,৬৮,৪৮৪ কোটি টকা৷ ইফালে ব্যক্তিগত আয়কৰ আৰু এছ টি টি হিচাপে সংগ্রহ হৈছে ৩,৩০,৪৯০ কোটি টকা৷ কৰ সংগ্রহ বৃদ্ধিয়ে দেশৰ সামগ্রিক অর্থনীতিলৈ আশা কঢ়িয়াই আনিছে৷