দেশী–বিদেশী পৰিভ্রমী পক্ষীৰ কলৰৱেৰে মুখৰ দীপৰ বিল

নিয়মীয়া বার্তা, ২৩ ডিচেম্বৰঃ শীতৰ আগমনৰ লগে লগে দেশী–বিদেশী পৰিভ্রমী পক্ষীৰ কলৰৱেৰে মুখৰ হৈ পৰিছে ৰাজ্যৰ একমাত্র পক্ষী অভয়াৰণ্য দীপৰ বিল৷ দীপৰৰ বুকুত দিনে–নিশাই জলকেলি কৰি আত্মহাৰা হৈ পৰিছে বিহংগৰ জাক৷

উল্লেখ্য যে প্রত্যেক বছৰে নৱেম্বৰ মাহৰ মাজভাগৰ পৰা দীপৰ বিললৈ আগমন ঘটে দেশী–বিদেশী পৰিভ্রমী পক্ষীৰ৷ ছাইবেৰিয়া, চীন, অষ্ট্রেলিয়া, দক্ষিণ আফ্রিকা, ঘানা, নিউগিনি, কানাডা আদি ৰাষ্ট্রৰ পৰা হাজাৰ হাজাৰ মাইল দূৰত্ব অতিক্রম কৰি পৰিভ্রমী পক্ষীৰ জাক দীপৰ বিললৈ আহে৷ কিন্তু এইবেলি পৰিভ্রমী পক্ষীৰ উপস্থিতি দীপৰ বিলত তেনেই সেৰেঙা বুলি বিলখনৰ দাঁতিকাষৰীয়া লোকসকলে মত ব্যক্ত কৰিছে৷ জলবায়ু পৰিৱর্তনেই ইয়াৰ অন্যতম কাৰক হিচাপে চিহ্ণিত হৈছে৷

কিয়নো, দুদিনমান আগলৈকে গুৱাহাটী মহানগৰীত অনুভূত হোৱা নাছিল শীতৰ মাদকতা৷ মহানগৰীৰ চৌদিশে থকা প্রতিখন পাহাৰতে কম বেছি পৰিমাণে হৈছে অবাধ বেদখল৷ পাহাৰ ভৈয়ামৰ গছ–গছনি কাটি তহিলং কৰাৰ পৰিণতিত স্বাভাৱিকতে ব্যাপক পৰিৱর্তন ঘটিছে জলবায়ুৰ৷

তদুপৰি ৰাজ্যৰ একমাত্র পক্ষী অভয়াৰণ্য হিচাপে পৰিচিত দীপৰ বিলৰ চাৰিওফালে গঢ়ি উঠিছে অসংখ্য উদ্যোগ–কাৰখানা৷ উদ্যোগ–কাৰখানাৰ পৰা নির্গত ধোঁৱা, বর্জিত দূষিত পানী আৰু বিকট শব্দই দীপৰ বিললৈ পৰিভ্রমী পক্ষীৰ আগমনত বাধাৰ সৃষ্টি কৰিছে৷ গুৱাহাটী পৌৰ নিগমে দীপৰ বিলক ডাষ্টবিন হিচাপে ব্যৱহাৰ কৰাৰ লগতে গুৱাহাটী মহানগৰ উন্নয়ন প্রাধিকৰণে গুৱাহাটীৰ বর্জিত আৰু দূষিত পানী দীপৰ বিলত পেলোৱাৰ ব্যৱস্থা কৰিছে৷ ফলত ভয়াৱহভাৱে প্রদূষিত হৈ পৰিছে দীপৰৰ জলৰাশি৷

এনেবোৰ ভিন্ন পাৰিপার্শ্বিক কাৰণত দীপৰ বিললৈ দেশী–বিদেশী পৰিভ্রমী পক্ষীৰ আগমন যথেষ্ট হ্রাস পোৱা বুলি স্থানীয় লোকসকলে মত ব্যক্ত কৰিছে৷ অৱশ্যে বিগত দুদিন ধৰি শীতৰ মাদকতা নামি অহাৰ পিছত দীপৰ বিললৈ পৰিভ্রমী পক্ষীৰ আগমন ঘটিব বুলি আশা ব্যক্ত কৰিছে দাঁতিকাষৰীয়া লোকসকলে৷ হয়তো কিছুদিন পিছতে হাজাৰ হাজাৰ দেশী–বিদেশী পৰিভ্রমী পক্ষীৰ জলকেলি আৰু কলৰৱেৰে মুখৰিত হৈ পৰিব দীপৰ বিলৰ বুকু৷