নিয়মীয়া বাৰ্তা, ২৩ জুলাইঃ পেট্র’লজাত সামগ্রীকে ধৰি অত্যাৱশকীয় খাদ্যসামগ্রীৰ অস্বাভাৱিক মূল্যবৃদ্ধিয়ে ৰাইজক জুৰুলা কৰাৰ সময়তে গুৱাহাটী মহানগৰীত একাংশ অসাধু ব্যৱসায়ীয়ে নিজৰ খেয়াল–খুচি মতে দাম বৃদ্ধিৰে গ্রাহকক লুণ্ঠন চলাই আহিছে৷
শেহতীয়াকৈ ইছলাম ধর্মাৱলম্বী লোকসকলৰ পৱিত্র ঈদৰ সুযোগ লৈ একাংশ অসাধু ব্যৱসায়ীয়ে কালিৰ দিনটোত প্রতিকেজি ব্রইলাৰত ৩৫০ টকাকৈ বিক্রী কৰাৰ অভিযোগ উত্থাপন হৈছে৷ ঈদৰ বাবে সৰহসংখ্যক ব্যৱসায়ীয়ে দোকান বন্ধ ৰখাৰ সুযোগ লৈ মহানগৰীৰ বিভিন্ন স্থানত প্রতিকেজি কটা ব্রইলাৰ ৩৫০ টকাকৈ বিক্রী কৰে৷ গ্রাহকসকলেও বাধ্য হৈ ব্যৱসায়ীয়ে নির্ধাৰণ কৰা দামতে মাংস ক্রয় কৰিবলগীয়া হয়৷
মহানগৰীৰ উজান বজাৰ, নুনমাটি, উলুবাৰী, হাতীগাঁৱকে ধৰি বিভিন্ন স্থানত অসাধু ব্যৱসায়ীসকলে অত্যধিক দামত বইলাৰ মাংস বিক্রী কৰাক লৈ তীব্র প্রতিক্রিয়াৰ সৃষ্টি হৈছে৷ সেয়েহে গুৱাহাটী মহানগৰীত ব্রইলাৰ মাংসৰ দাম নির্ধাৰণ কৰিবলৈ জিলা প্রশাসনক আহ্বান জনাইছে ভুক্তভোগী গ্রাহকসকলে৷