নিয়মীয়া বার্তা, ৫ আগষ্টঃ মহানগৰীৰ সমীপৱর্তী পানীখাইতীত কালি নিশা সংঘটিত হয় এক ভয়ংকৰ অগ্নিকাণ্ডৰ ঘটনা৷ পানীখাইতীত থকা পণ্ডছ আৰু চয়াবিন কোম্পানীৰ ফেক্টৰী এটাত নিশা প্রায় ১০ বজাত হঠাৎ জুইৰ সূত্রপাত হয়৷
মুহূর্তৰ ভিতৰতে লেলিহান জুইৰ শিখাই আগুৰি ধৰে সমগ্র ফেক্টৰীটো৷ স্থানীয় লোকে জুইৰ ভয়াৱহ ৰূপ দেখি অগ্ণিনির্বাপক বাহিনীক খবৰ দিয়ে৷ অগ্নিনির্বাপক বাহিনী ঘটনাস্থলীত উপস্থিত হোৱাৰ সময়লৈ অগ্নিকাণ্ডই আৰু ভয়াৱহ ৰূপ ধাৰণ কৰিছিল৷
পৰৱর্তী সময়ত আন কেইবাখনো বাহনেৰে জুই নুমুওৱাৰ চেষ্টা চলোৱা হয় যদিও জুই নির্বাপিত হওঁতে বহু সময় লাগে। ৬ খনকৈ গাড়ীৰে অগ্নিনির্বাপক বাহিনীয়ে জুই নির্বাপণ কৰিবলৈ সক্ষম হয়৷ অগ্নিকাণ্ডৰ প্রকৃত কাৰণ আৰু ক্ষয়ক্ষতিৰ সঠিক পৰিমাণ জানিব পৰা হোৱা নাই যদিও প্রত্যক্ষদর্শীয়ে জনোৱা মতে নিশাৰ ভয়াৱহ অগ্নিকাণ্ডত কেইবা লাখ টকাৰ সা–সম্পত্তি জাহ যোৱাটো নিশ্চিত৷
এই ভয়াৱহ অগ্নিকাণ্ডই সমগ্র পানীখাইতী অঞ্চলতে আতংকময় পৰিস্থিতিৰ সৃষ্টি কৰিছে৷