নিয়মীয়া বাৰ্তা, ১৯ ছেপ্টেম্বৰঃ দীর্ঘদিন ধৰি মেৰামতি নকৰাৰ ফলত জৰাজীর্ণ হৈ পৰিছে গুৱাহাটী মহানগৰীৰ বিভিন্ন স্থানৰ পদপথ৷ মেনহল অথবা নলাৰ ওপৰত থকা লোৰ ঢাকনি মেৰামতিৰ অভাৱত যাতায়াতৰ অনুপযোগী হৈ পৰিছে৷ যিকোনো সময়ত এই পদপথসমূহৰ পৰা ভয়ংকৰ দুর্ঘটনা হোৱাৰ আশংকাই দেখা দিছে৷
বিশেষকৈ সদাব্যস্ত গণেশগুৰি উৰণীয়া সেতুৰ সমীপৰ পদপথ সম্প্রতি মৰণফান্দত পৰিণত হৈছে৷ গণেশগুৰিৰ একাংশ ব্যৱসায়ীয়ে জানিবলৈ দিয়া মতে গণেশগুৰি উৰণীয়া সেতুৰ তলত জি এছ ৰোডৰ মূল পদপথৰ ওপৰত থকা লোৰ ঢাকনি যোৱা তিনি মাহৰ পৰা খহি তললৈ বহি গৈছে৷
মূল পদপথৰ পৰা তললৈ নামি যোৱা এই পদপথৰ ওপৰৰেই নিতৌ শ শ পথচাৰী খোজকাঢ়ি পাৰ হোৱাৰ বিপৰীতে বহু যান–বাহন বিপদসংকুলভাৱে কছাৰীবস্তিৰ উপ–পথ অভিমুখে অহা–যোৱা কৰিছে৷ যিকোনো মুহূর্তত উক্ত পদপথত ভয়ংকৰ দুর্ঘটনা সংঘটিত হোৱাৰ সম্ভাৱনা থকা বুলি স্থানীয় ব্যৱসায়ীসকলে মতামত ব্যক্ত কৰে৷
ইপিনে, হাতীগাঁও চাৰিআলিৰ পৰা সিজুবাৰীলৈ যোৱা পথৰ পদপথো যাতায়াতৰ অনুপযোগী হৈ পৰিছে৷ এছবিআই বেংকৰ সমীপত উন্মুক্ত পদপথে যিকোনো সময়ত অঘটন ঘটাব পাৰে বুলি স্থানীয় লোকে জানিবলৈ দিছে৷ সেয়েহে পদপথৰ লগতে জহি–খহি যোৱা পদপথৰ ঢাকনি মেৰামতি কৰিবলৈ লোকনির্মাণ বিভাগৰ লগতে ৰাইজে জি এম চি কর্তৃপক্ষক আহ্বান জনাইছে৷