জি এম ডি এত দুর্নীতিৰ বজাৰ অধীক্ষক ভুবনেশ্বৰ বৰপূজাৰীৰ

নিয়মীয়া বাৰ্তা, ১৫ জুনঃ ৰাজ্য চৰকাৰে দুর্নীতিৰ বিৰুদ্ধে শূন্য সহনশীল স্থিতি গ্রহণ কৰিলেও একাংশ চৰকাৰী কর্মচাৰীয়ে বিভাগীয় শিথিলতাৰ সুযোগ লৈ অবাধ দুর্নীতি সংঘটিত কৰি আহিছে৷ শেহতীয়াকৈ গুৱাহাটী মহানগৰ উন্নয়ন প্রাধিকাৰী চমুকৈ জি এম ডি এত চলি থকা ভয়াৱহ দুর্নীতিৰ তথ্য পোহৰলৈ আহিছে৷

জি এম ডি এৰ মুখ্য কার্যবাহী বিষয়াৰ দুর্বলতাৰ সুযোগ লৈ কার্যালয়টোত একাংশ কর্মচাৰীয়ে বছৰৰ পিছত বছৰ ধৰি অবাধ দুর্নীতি সংঘটিত কৰি অহাৰ অভিযোগ উত্থাপিত হৈছে৷ জি এম ডি এৰ কার্যালয়ত বিগত কেইবাবছৰ ধৰি অধীক্ষক ভুবনেশ্বৰ বৰপূজাৰীয়ে গাড়ী ভাৰা লোৱাৰ নামত অবাধ দুর্নীতি সংঘটিত কৰি অহাৰ অভিযোগ উত্থাপিত হৈছে৷

জি এম ডি এৰ কার্যালয়ত পাঁচখনকৈ ইন’ভা, দুখন বলেৰ’সহ প্রায় ১২খন চৰকাৰী বাহন আছে৷ বিভাগীয় কাম–কাজৰ বাবে জি এম ডি এ কর্তৃপক্ষই আঠখনকৈ গাড়ী ভাৰাত লৈছিল৷ চৰকাৰী নীতি–নির্দেশনা উলংঘা কৰি কোনো চুক্তিপত্র নোহোৱাকৈ প্রতিমাহে গাড়ী ভাৰাৰ নামত লাখ লাখ টকা সৰকাই আহিছিল৷

এইক্ষেত্রত জি এম ডি এৰ অধীক্ষক ভুবনেশ্বৰ বৰপূজাৰীয়ে বিশেষ ভূমিকা লোৱাৰ অভিযোগ উত্থাপিত হৈছে৷ এগৰাকী চৰকাৰী দায়িত্বশীল বিষয়া হৈও বৰপূজাৰীয়ে পত্নীৰ নামত ক্রয় কৰা ব্যক্তিগত ছুইফ্ট ডিজায়াৰ জি এম ডি এক বিগত কেইবাবছৰ ধৰি ভাৰাত দিছিল৷

জি এম ডি এ কর্তৃপক্ষই চুক্তিপত্র নোহোৱাকৈ ভাৰালৈ লোৱা এ এছ ০১ ডি জি ৩২৫২ নম্বৰৰ বাহনখনৰ বাবদ প্রতিমাহে ৪৭,৫০০ টকা, এ এছ ০১ এম এ ০৪৮৭ নম্বৰৰ বাহনখনত ২০,০০০, এ এছ ০১ ডি কিউ ৫২৮৮ নম্বৰৰ গাড়ীখনত ৩২,০০০, এ এছ ০১ ই চি ৮৯৯১ নম্বৰৰ বাহনখনত ২০,০০০, এ এছ ডি বি ৩৪৯০ নম্বৰৰ বাহনখনত ৩২,০০০, এ এছ ০১ এম বি ০০০২ নম্বৰৰ বাহনখনত ৩২,০০০, এ এছ ০১ ডি এফ ২১০০ নম্বৰৰ বাহনখনত ৩২,০০০, এ এছ ০১ ডি এছ ৩৭৪০ নম্বৰৰ বাহনখনত ৩২,০০০ টকাকৈ ভাৰা আদায় দি আহিছে৷

জি এম ডি এৰ কর্তৃপক্ষই চুক্তিপত্র নোহোৱাকৈ বাণিজ্যিক বাহনৰ বিপৰীতে ব্যক্তিগত বাহন কেনেদৰে বছৰৰ পিছত বছৰ ধৰি ভাৰাত চলালে সেয়া ৰহস্যৰ বিষয়৷ জি এম ডি এত বাহন ভাৰাৰ নামত প্রতিমাহে সংঘটিত লাখ লাখ টকাৰ দুর্নীতিৰ তদন্ত কৰিবনে জি এম ডি এৰ মুখ্য কার্যবাহী বিষয়াই৷ ইয়াৰ উপৰি জি এম ডি এৰ কার্যালয়ত উৎকোচ নিদিলে বছৰৰ পিছত বছৰ ধৰি ফাইল পৰি থকা বুলি একাংশ ভুক্তভোগীয়ে অভিযোগ কৰিছে৷ কার্যালয়ত কর্মৰত বিভা চক্রৱর্তী আৰু অস্থায়ী কর্মচাৰী বিশ্বজিৎ সোমক ধন নিদিলে ফাইল লৰচৰ নকৰে বুলিও অভিযোগ আনিছে ভুক্তভোগী লোকসকলে৷

জি এম ডি এৰ কার্যালয়ত মুখ্য কার্যবাহী বিষয়াৰ অজ্ঞাতে চলি থকা দুর্নীতি ৰোধ কৰাৰ বাবে বিষয়াগৰাকীয়ে কি ব্যৱস্থা গ্রহণ কৰে সেয়া লক্ষণীয় হ’ব৷ লক্ষণীয় যে কিছুদিন পূর্বে চুক্তিপত্র নোহোৱাকৈ ভাৰাত লোৱা গাড়ীসমূহ বিভাগীয় কাম–কাজত ব্যৱহাৰ কৰিব নোৱাৰিব বুলি মুখ্য কার্যবাহী বিষয়াগৰাকীয়ে নির্দেশ জাৰি কৰিছে৷ দীর্ঘদিন ধৰি ব্যক্তিগত বাহন ভাৰালৈ লৈ চলোৱা বিষয়টোৰ তদন্ত কৰিবনে মুখ্য কার্যবাহী বিষয়াগৰাকীয়ে৷