নিয়মীয়া বাৰ্তা, ১১ জুনঃ ৰাণীস্থিত ১৭৫ নং কেন্দ্রীয় সংৰক্ষিত আৰক্ষী বাহিনী চমুকৈ চি আৰ পি এফে গছপুলি ৰোপণৰ এলানি কার্যসূচী হাতত লৈছে৷ ইয়াৰে অংশ হিচাপে আজি কমাণ্ডেণ্ট সুভাষ চন্দ্র শর্মাৰ নেতৃত্বত মহানগৰীৰ গোপাল বড়ো হাইস্কুলৰ খেলপথাৰত প্রায় ৩০০ গছপুলি ৰোপণ কৰে৷ উক্ত কার্যসূচীত পংকজ কুমাৰ ঝা, নিৰীক্ষক পংকজ কুমাৰ ডেকাৰ লগতে চি আৰ পি এফৰ জোৱানসকল উপস্থিত থাকে৷ চি আৰ পি এফে গছপুলি ৰোপণ কার্যসূচীৰ অংশ হিচাপে মহানগৰীৰ বিভিন্ন চৰকাৰী কার্যালয়, স্কুল আদিত ১০০০ গছপুলি ৰোপণ কৰিব বুলি অজিত কুমাৰ ডেকাই জানিবলৈ দিছে৷ লগতে গছপুলিসমূহৰ প্রতিপালনৰ দায়িত্বও চি আৰ পি এফে গ্রহণ কৰিব৷