‘স্বাভাৱিক’ গুৱাহাটীত নিশা ৯ বজালৈ খুলিল পথৰ দুয়োকাষৰ দোকান

নিয়মীয়া বাৰ্তা ১৮ আগষ্টঃ   সুদীর্ঘ চাৰে চাৰি মাহ পাছত কার্যতঃ কিছু স্বাভাৱিক অৱস্থালৈ ঘূৰি আহিল গুৱাহাটী মহানগৰী৷ ক’ভিড–১৯ সংক্রমণ ৰোধৰ স্বার্থত বিগত দিনসমূহত বলৱৎ হোৱা লকডাউন, আনলকৰ কঠোৰতাসমূহ চৰকাৰ প্রশাসনে আজিৰে পৰা কার্যকৰী হোৱাকৈ যথেষ্ট পৰিমাণে শিথিলতা আনি আৰম্ভ কৰিছে আনলক–৩৷ আজিৰে পৰা অহা ৩১ আগষ্টলৈ জাৰি কৰা আনকল–৩ অনুসৰি, গুৱাহাটী মহানগৰীকে ধৰি ৰাজ্যখনত দোকান–পোহাৰ, বজাৰ–সমাৰ খোলা, যাতায়াতৰ সময় পুৱা ৫ বজাৰ পৰা নিশা ৯ বজাপর্যন্ত অনুমতি প্রদান কৰা হৈছে৷ সেইদৰে ক’ভিড প্রট’কল অনুসৰণ কৰি মাস্ক পৰিধান, সামাজিক দূৰত্ব অক্ষুণ্ণ ৰাখি ছেনিটাইজাৰ ব্যৱস্থাৰ লগতে ৫০ শতাংশ যাত্রী কঢ়িয়াই চিটীবাছ চলাচলৰ অনুমতি প্রদান কৰা হৈছে৷ অনুৰূপ ধৰণে একেই ব্যৱস্থাপনাৰে আন্তঃজিলা যাতায়াতৰো অনুমতি দিয়া হৈছে৷ প্রত্যেক সপ্তাহত সোমবাৰৰ পৰা শুকুৰবাৰ পর্যন্ত সেই ব্যৱস্থাৰে বাছ–মটৰৰ চলাচল অব্যাহত থাকিব৷ আজি আনলক–৩ৰ প্রথম দিনটোত গুৱাহাটী মহানগৰীত ক’ভিড প্রট’কল অনুসৰি সুদীর্ঘ চাৰে চাৰি মাহ পাছত চিটীবাছৰ চলাচল আৰম্ভ হয়৷ সেইদৰে আন্তঃজিলা যাতায়াত আৰম্ভ হোৱাৰ পৰিপ্রেক্ষিতত পুনৰ প্রাণ পাই উঠিছে বেতকুছিস্থিত আই এছ বি টি, মাছখোৱা আৰু পল্টন বজাৰৰ ৰাজ্যিক পৰিবহণ নিগমৰ আস্থান, আদাবাৰীস্থিত বাছ আস্থান৷ মন কৰিবলগীয়া এয়ে যে যোৱা দুটা সপ্তাহত প্রশাসনে প্রতি সোম আৰু মঙলবাৰেহে আন্তঃজিলা যাতায়াতৰ অনুমতি প্রদান কৰিছিল৷ আজিৰে পৰা অহা ৩১ আগষ্ট পর্যন্ত সোমবাৰৰ পৰা শুকুৰবাৰলৈ সপ্তাহত ৫ দিনহে আন্তঃজিলা যাতায়াতৰ অনুমতি প্রদান কৰে৷ ইপিনে, গুৱাহাটী মহানগৰীত আজিৰে পৰা পথৰ দুয়োকাষে দোকান–পোহাৰসমূহ খোলাৰ অনুমতি দিয়াত স্বাভাৱিকতে ব্যৱসায়িক প্রতিষ্ঠানসমূহতো ব্যস্ততা বৃদ্ধি পাইছে৷ যোৱা চাৰে চাৰিটা মাহৰ স্তব্ধতাৰ বিপৰীতে আজি নিশা ৯ বজা পর্যন্ত মহানগৰীত দেখা গ’ল ব্যাপক জনসমাগম৷ চিটীবাছ, অলা–উবেৰ, অটোৰিক্সা, মেজিক, ৰিক্সাৰ লগতে ৰাজপথত দেখা গ’ল ব্যক্তিগত চাৰিচকীয়া, দুচকীয়া বাহনৰ ব্যাপক ভিৰ৷ চৰকাৰী কার্যালয়সমূহতো বিষয়া–কর্মচাৰীৰ উপস্থিতি আজি লক্ষণীয়ভাৱে বৃদ্ধি পোৱা পৰিলক্ষিত হৈছে৷ চিটীবাছকে ধৰি ৰাজহুৱা পৰিবহণ আৰু ব্যক্তিগত বাহনৰ চলাচলত অনুমতি প্রদানৰ বাবেই জনতা ভৱনকে ধৰি প্রতিটো চৰকাৰী কার্যালয়ত বিষয়া–কর্মচাৰী অহাৰ ক্ষেত্রত ইমানদিনে উদ্ভৱ হোৱা সমস্যাৰো অৱসান ঘটে৷ ইপিনে, দীর্ঘ বিৰতিৰ অন্তত গুৱাহাটী আৰু যোৰহাটৰ মাজত জনশতাব্দী এক্সপ্রেছ ৰে’লখনৰ চলাচল আৰম্ভ হৈছে৷ উত্তৰ–পূব সীমান্ত ৰে’লৱেৰ জনসম্পর্কৰক্ষী বিষয়া নৃপেন্দ্র ভট্টাচার্যই জানিবলৈ দিয়া মতে, ৰাজ্য চৰকাৰৰ আনলকৰ নীতি–নিয়ম অনুসৰি সপ্তাহত সোমবাৰৰ পৰা শুকুৰবাৰলৈহে সেই ৰে’লখনৰ চলাচল অব্যাহত থাকিব৷ আনহাতে, আনলক–৩ আৰম্ভ হোৱা প্রথম দিনটোৱেই শাওণ মাহৰ অন্তিম সোমবাৰ হোৱাৰ পৰিপ্রেক্ষিতত আজি দেখা গ’ল শিৱ মন্দিৰসমূহত ভক্তৰ লানি নিছিগা ভিৰ৷ অৱশ্যে বহু শিথিলতাৰে আনলক–৩ আৰম্ভ হ’লেও আজিৰ দিনটোতো বন্ধ হৈ আছে শিক্ষানুষ্ঠান, চিনেমাগৃহ, পার্ক ইত্যাদি৷ এই প্রসংগতে উল্লেখনীয় এয়ে যে ক’ভিড–১৯ৰ সংক্রমণ ৰোধৰ বাবে সমগ্র দেশত যোৱা ২৪ মার্চৰ মাজনিশাৰ পৰা আৰম্ভ হোৱা লকডাউন মুঠ চাৰিটা পর্যায়ত ৩১ মে’ পর্যন্ত বাহাল থাকে৷ যোৱা ১ জুনৰ পৰা আনলক প্রক্রিয়া আৰম্ভ হয় যদিও ৰাজ্যখনত ক’ভিডৰ সংক্রমণ বৃদ্ধি পাবলৈ ধৰাত জুনৰ শেষভাগৰ পৰা গুৱাহাটীকে ধৰি ৰাজ্যখনৰ বিভিন্ন জিলাত প্রশাসনে পুনৰ লকডাউন ঘোষণা কৰিবলৈ বাধ্য হয়৷ শেহতীয়াকৈ ৰাজ্যখনত সংক্রমণৰ হাৰ হ্রাস পোৱাৰ পৰিপেক্ষিতত চৰকাৰে অর্থনৈতিক কাম–কাজ আৰম্ভ কৰাৰ লক্ষ্য আগত ৰাখি আজিৰে পৰা যথেষ্ট শিথিলতাৰে আনলক–৩ আৰম্ভ কৰে৷