নিয়মীয়া বাৰ্তা, ১৩ জুনঃ ক’ভিড সংক্রমণ ৰোধৰ বাবে কেন্দ্রীয় চৰকাৰৰ নির্দেশত ভেকচিন প্রদান কার্যসূচী দ্রুত কৰি তুলিছে স্বাস্থ্য বিভাগে৷ এই লক্ষ্যৰে ৰাজ্যত প্রতিদিনে তিনি লাখ লোকক ভেকচিন প্রদানৰ পদক্ষেপ লৈছে বিভাগটোৱে৷
শনিবাৰে এই কথা স্পষ্ট কৰিলে স্বাস্থ্যমন্ত্রী কেশৱ মহন্তই৷ কামৰূপ (মহানগৰ) জিলাৰ ক’ভিড পৰিস্থিতি সন্দর্ভত আজি এক পর্যালোচনা বৈঠকৰ পাছতেই এই কথা ঘোষণা কৰে স্বাস্থ্যমন্ত্রী মহন্তই৷ সংবাদ মাধ্যমৰ আগত স্বাস্থ্যমন্ত্রী মহন্তই প্রকাশ কৰা অনুসৰি ইতিমধ্যে গুৱাহাটীত ৬ লাখ ৬ হাজাৰ লোকক ভেকচিন প্রদান কৰা হৈছে৷ গুৱাহাটীত প্রায় চাৰি লাখ লোকক ভেকচিন প্রদান কৰিলে এই কার্যসূচী মহানগৰীত সম্পূর্ণ কৰিব পৰা যাব৷ তেওঁ কামৰূপ মহানগৰ জিলাৰ ক’ভিড পৰিস্থিতি সন্দর্ভত বিস্তৃত তথ্য দাঙি ধৰি জানিবলৈ দিয়া মতে, মহানগৰীত তিনিটা ক’ভিড কেয়াৰ চেণ্টাৰত এতিয়াও ১,০৯০খন বিছনা খালী আছে৷ বর্তমান ৬৭১জন ক’ৰোনা আক্রান্তইহে চিকিৎসাধীন হৈ আছে৷ বর্তমান সৰুসজাইত থকা ক’ভিড কেয়াৰ চেণ্টাৰত ৪০০খন, ৰয়েল গ্ল’বেল ক’ভিড চেণ্টাৰত এহাজাৰখন আৰু আজাৰৰ কাঁহিকুছিস্থিত এছ আই আৰ ডিত ২৭০খন বিছনা আছে৷ স্বাস্থ্য বিভাগে আক্রান্তৰ হাৰ হ্রাস কৰাৰ বাবে সর্বাধিক গুৰুত্ব দিছে টেষ্টিং, ট্রেছিং আৰু ট্রিটমেণ্টত৷ সমান্তৰালভাৱে টিকাকৰণ বৃদ্ধিৰ ক্ষেত্রতো স্বাস্থ্য বিভাগে বিশেষ পদক্ষেপ হাতত লৈছে৷ ইতিমধ্যে দুহাজাৰটা দল টিকাকৰণৰ বাবে সাজু কৰি তোলা হৈছে৷
ইয়াৰ পূর্বে স্বাস্থ্যমন্ত্রীগৰাকীয়ে কামৰূপ ‘মহানগৰ) জিলা উপায়ুক্তৰ কার্যালয়ত ক’ভিডসৃষ্ট পৰিস্থিতিৰ পর্যালোচনা কৰি গুৱাহাটীৰ পজিটিভিটীৰ ৰেট হ্রাস কৰাৰ ক্ষেত্রত কি কি পদক্ষেপ গ্রহণ কৰিব পাৰি, সেই সন্দর্ভত বিস্তৃত আলোচনা কৰে৷ পর্যালোচনা বৈঠকত পৌৰ নিগমৰ অতিৰিক্ত আয়ুক্ত পুলক মহন্তই প্রকাশ কৰা মতে, গুৱাহাটীত ইতিমধ্যে ৭৪,৮২৭জন লোকক পৰীক্ষা কৰোৱাৰ অন্তত ৮,১৮৩জন লোক পজিটিভ চিনাক্ত হৈছে৷
আনহাতে, জিলা উপায়ুক্ত বিশ্বজিৎ পেগুৱে বৈঠকত স্বাস্থ্যমন্ত্রীক অৱগত কৰে যে যোৱা এক এপ্রিলৰ পৰা ১১ জুনলৈকে জিলাখনৰ ৬,৩৮,৫৫২জন ব্যক্তিক ক’ভিড পৰীক্ষা কৰাৰ বিপৰীতে ৫১,৮৮৩জন পজিটিভ চিনাক্ত হৈছে৷ আক্রান্তসকলৰ ২,৮১৫জন কামৰূপ জিলাৰ৷ তদুপৰি ১১ জুন পর্যন্ত মৃত্যু হৈছে ৭৪৮জন ক’ভিড ৰোগীৰ৷ জিলাখনত ৫,১৫,৭৬৫জন লোকক ক’ভিশ্বিল্ড আৰু ৯১,১২৭জন লোকক ক’ভাক্সিন প্রতিষেধক প্রদান কৰা হৈছে৷
ইফালে বৈঠকৰ অন্তত লকডাউন সন্দর্ভত স্বাস্থ্যমন্ত্রীগৰাকীয়ে কয় যে গুৱাহাটীত পূর্বতকৈ পজিটিভিটীৰ হাৰ যথেষ্ট হ্রাস পাইছে৷ এটা সময়ত গুৱাহাটীত ৭ শতাংশলৈ বৃদ্ধি পাইছিল পজিটিভিটীৰ হাৰ৷ বর্তমান তিনি শতাংশলৈ হ্রাস পাইছে আক্রান্তৰ হাৰ৷ অহা ১৫ জুনলৈ আক্রান্তৰ হাৰ এইদৰে হ্রাস পালে গুৱাহাটীত নীতি–নিয়মৰ ক্ষেত্রত কিছু শিথিলতা অনা হ’ব৷ এই পর্যালোচনা বৈঠকত পৌৰ নিগমৰ আয়ুক্ত দেৱাশিস শর্মা, মহানগৰৰ যুটীয়া আৰক্ষী আয়ুক্ত দেৱৰাজ উপাধ্যায় আদিকে কৰি কেইবাজনো শীর্ষ বিষয়া উপস্থিত থাকে৷