নিয়মীয়া বাৰ্তা, ৮ ডিচেম্বৰঃ মহানগৰীৰ পাথৰকোৱেৰীত সংঘটিত হৈছে এক নৃশংস হত্যাকাণ্ড। পাথৰকোৱেৰীৰ মেগজিন নামৰ অঞ্চলত লোৰ ৰডেৰে মুন্না আলী নামৰ এগৰাকী যুৱকক হত্যা কৰে অচিনাক্ত দুৰ্বৃত্তই।
পেছাত ৰাজমিস্ত্ৰীৰ কাম কৰা মুন্না আলীৰ ঘৰ ছয়মাইলৰ ৰাধানগৰত। আজি পুৱা মেগজিনৰ শিলসাকো বিলৰ পাৰত মুন্না আলীৰ অৰ্ধ উলংগ মৃতদেহ উদ্ধাৰ হয়। জানিব পৰা মতে, চাৰিজনীয়া পৰিয়ালটোক পোহপাল দিয়া মুন্না আলীয়ে কামৰ সন্ধানত কালি পুৱা ওলাই আহিছিল ঘৰৰ পৰা।
কিন্তু নিশা ঘৰলৈ উভতি নোযোৱাত বিচাৰ-খোঁচাৰ আৰম্ভ কৰে পৰিয়ালে। কিন্তু আজি পুৱা শিলসাকোৰ পাৰত এটা নিৰ্মীয়মাণ ঘৰৰ কাষত তেজেৰে লুতুৰি-পুতুৰি হৈ থকা অৱস্থাত মৃতদেহ উদ্ধাৰ হয় মুন্নাৰ। ঘটনাস্থলীত আৰক্ষী আহি মৃতদেহৰ কাষত মোবাইল, জোতাৰ লগতে ৰড পৰি থকা প্ৰত্যক্ষ কৰাত এয়া আক্ৰমণজনিত হত্যাকাণ্ড বুলি নিশ্চিত হৈছে আৰক্ষী।