নিয়মীয়া বাৰ্তা ১২ এপ্ৰিলঃ গুৱাহাটী ৰে’ল ষ্টেচনত আজি আৰপিএফৰ জোৱানে অভিযান চলাই নামনিমুৱা ৰাজধানী এক্সপ্রেছৰ পৰা এটা ম’বাইল চোৰক গ্রেপ্তাৰ কৰাৰ লগতে তিনিটা চুৰি ম’বাইল ফোন উদ্ধাৰ কৰে৷
ধৃত চোৰটো মহানগৰীৰ গড়চুক থানাৰ অন্তর্গত কটহবাৰীৰ ১নং মছজিদ গলিৰ মিৰাজ আলী (২০) বুলি ৰে’ল আৰক্ষীয়ে জানিবলৈ দিছে৷ আৰক্ষী সূত্রই জনোৱা মতে, লামডিঙৰ পৰা গুৱাহাটী অভিমুখী নামনিমুৱা ৰাজধানী এক্সপ্রেছখন আজি বিয়লি প্রায় ৪.৩০ বজাত গুৱাহাটী ষ্টেচনত উপস্থিত হয়৷
আৰপিএফৰ জোৱানে ৰাজধানী এক্সপ্রেছত তালাচী চলোৱাৰ সময়তে সন্দেহজনকভাৱে যুৱকজনক আটক কৰি সোধা–পোছা কৰাত সকলো তথ্য পোহৰলৈ আহে৷
উল্লেখ্য যে ধৃত যুৱকজনে ৰে’লখনত যাত্রীৰ পৰা ম’বাইল ফোন লুট কৰি আহিছে৷ আৰপিএফৰ জোৱানে সোধা–পোছাৰ অন্তত ধৃত চোৰটোক জিআৰপি থানাত গতাই দিয়ে৷ সম্প্রতি জিআৰপি থানাত আৰক্ষীয়ে ঘটনা সন্দর্ভত এটা গোচৰ ৰুজু কৰি চোৰটোক জেৰা অব্যাহত ৰাখিছে৷