নিয়মীয়া বাৰ্তা ৩১ জানুৱাৰীঃ মহানগৰীৰ চন্দ্রপুৰ অঞ্চলৰ পাণবাৰীৰ চাহ বাগিচাৰ ভিতৰত এটা বনৰীয়া হাতীৰ পোৱালিৰ মৃতদেহ উদ্ধাৰক লৈ তীব্র চাঞ্চল্যৰ সৃষ্টি হৈছে৷ জানিব পৰা মতে, বৃহস্পতিবাৰে পুৱাৰ ভাগত অঞ্চলটোৰ একাংশ ৰাইজে চাহ বাগিচাৰ ভিতৰত হাতীৰ পোৱালিটোৰ মৃতদেহ প্রত্যক্ষ কৰে৷ ঘটনা প্রত্যক্ষদর্শী ৰাইজে ততালিকে ঘটনাটো আমছাং অভয়াৰণ্য কর্তৃপক্ষক অৱগত কৰে৷ অভয়াৰণ্য কর্তৃপক্ষই চিকিৎসক লগত লৈ ঘটনাস্থলীত উপস্থিত হৈ হাতীৰ পোৱালিটোৰ পৰীক্ষা–নিৰীক্ষা কৰে৷ পিছত বন বিভাগৰ লোকে উক্ত স্থানতে গাঁত খান্দি মৃত হাতীৰ পোৱালিটো পুতি থয়৷ স্থানীয় ৰাইজৰ সন্দেহ যে খাদ্যৰ সন্ধানত আমছাং অভয়াৰণ্যৰ পৰা ওলাই অহা বন্যহস্তীৰ জাকৰ ভিতৰত হাতীৰ পোৱালি আছিল৷ কিন্তু কি কাৰণত হাতীৰ পোৱালিটোৰ মৃত্যু হ’ল সেয়া ৰহস্যজনক৷ হয়তো বন্যহস্তীৰ জাকটোৰ মাজত কোনো সংঘাত হোৱাত হাতীৰ পোৱালিটোৰ মৃত্যু হৈছে৷ উল্লেখ্য যে যোৱা মঙলবাৰে খাদ্যৰ সন্ধানত আমছাং অভয়াৰণ্যৰ ৫ জনীয়া পোৱালিসহ এটা ৩২জনীয়া বন্যহস্তীৰ জাকে পাণবাৰী অঞ্চলৰ গৰৈমাৰী বিলত অৱস্থান কৰিছিল৷ বন্যহস্তীৰ জাকটোৱে যোৱানিশা অর্থাৎ বুধবাৰে নিশাৰ ভাগত পাণবাৰীৰ গৰৈমাৰী বিলৰ পৰা আঁতৰি চাহ বাগানৰ মাজেৰে আমছাং অভয়াৰণ্যত প্রৱেশ কৰিছিল৷ হয়তো সেই বন্যহস্তীৰ জাকটোৰ মাজৰ এটা পোৱালি হাতীয়ে মৃত্যুক আঁকোৱালি লয়৷ হাতীৰ পোৱালিটোৰ মৃত্যুৰ প্রকৃত কাৰণ এতিয়াও বন বিভাগে ৰাজহুৱা কৰা নাই৷