নিয়মীয়া বাৰ্তা, ২৮ জানুৱাৰীঃ ভাৰতত নাগৰিকত্ব সংশোধনী আইন (কা) বিৰোধী প্রতিবাদে উত্তাল পৰিস্থিতি সৃষ্টি কৰি থকা সময়তে ইউৰোপীয় সংসদে এই বিষয়টো সন্দর্ভত প্রস্তাৱ গ্রহণৰ যো–জা চলাইছে৷ চলিত সপ্তাহত ‘কা’ বিৰোধী প্রস্তাৱৰ ওপৰত বিতর্ক চলোৱাৰ সিদ্ধান্ত লৈছে ইউৰোপীয় সংঘ (ইইউ)ৰ সংসদে৷ সংবাদ সংস্থা পিটিআইৰ প্রতিবেদন অনুসৰি ইউৰোপীয় সংসদৰ এই সিদ্ধান্তত ক্ষোভ প্রকাশ কৰিছে নতুন দিল্লীয়ে৷
গণতান্ত্রিকভাৱে নির্বাচিত দেশৰ সংসদে গৃহীত কৰা আইনৰ ওপৰত ইউৰোপীয় সংঘৰ সংসদে কোনো ধৰণৰ প্রশ্ণৰ অৱতাৰণা কৰা নাই বুলি ক্ষোভ প্রকাশ কৰিছে ভাৰতে৷
উল্লেখনীয় যে ইউৰোপীয় সংঘৰ বিভিন্ন গোটে মুঠ ছটাকৈ প্রস্তাৱ দাখিল কৰিছে৷ প্রগ্রেছিভ এলায়েন্স অৱ ছ’চিয়েলিষ্ট, ডেমক্রেটছ ইন দ্য ইউৰোপিয়ান পার্লিয়ামেণ্ট আদিকে ধৰি ছটা গোটে দাখিল কৰা প্রস্তাৱৰ ওপৰত আগন্তুক বৃহস্পতিবাৰে বিতর্ক হ’ব৷
ইয়াৰ পৰৱর্তী দিনাখনেই এই প্রস্তাৱৰ ওপৰত গ্রহণ কৰা হ’ব ভোট৷ ইউৰোপীয় সংসদৰ এনে সিদ্ধান্তক লৈ ভাৰতৰ বিদেশ মন্ত্রণালয়ে ক্ষোভ প্রকাশ কৰা বুলি এক উচ্চস্তৰীয় সূত্রই সদৰী কৰিছে৷