🔹 অভিলেখ সৃষ্টিৰ দিশে মার্কিন ধনকুবেৰ জেফ বেজ’ছ
নিউজ ডেস্ক, ৪ এপ্রিল : মার্কিন ধনকুবেৰ জেফ বেজ’ছৰ ব্লু অৰিজিন কোম্পানীয়ে মহাকাশ পর্যটনৰ ওপৰত গুৰুত্ব প্রদান কৰি আহিছে৷ ইতিমধ্যে দহবাৰকৈ মহাকাশলৈ মানুহ প্রেৰণ কৰিছে ব্লু অৰিজিনে৷ এইবাৰ এই সংস্থাটোৱে ছগৰাকী মহিলাক মহাকাশলৈ প্রেৰণ কৰিবলৈ সাজু হৈছে৷ এয়া হ’ব মহাকাশলৈ ব্লু অৰিজিনৰ মহাকাশ যানৰ একাদশ যাত্রা৷ লক্ষণীয় বিষয়টো হৈছে- ব্লু অৰিজিনৰ নিউ ছেপার্ড ৰকেটে কেৱল এইবাৰ ছগৰাকী মহিলাকহে মহাকাশলৈ নিব৷ আগন্তুক ১৪ এপ্রিলত এই যানখনেৰে যাত্রা কৰিব ছগৰাকী মহিলাই৷ পশ্চিম টেক্সাছৰ পৰা এই যানখন উৎক্ষেপণ কৰা হ’ব৷ এই মিছনত অংশগ্রহণ কৰিব আইছা বোৱে, আমাণ্ডা গুয়েন, গাইলে কিং, কেটী পেৰী, কাৰিয়ানে ফ্লিন আৰু লাওৰেন ছানছেজে৷ পৃথিৱী আৰু মহাকাশৰ মাজৰ কাল্পনিক সীমান্ত ‘কাৰমান লাইন’ৰ ওপৰলৈ গৈ ১০ মিনিট সময় এই মহাকাশযানখনে ভ্রমণ কৰিব৷ উল্লেখনীয় যে ইয়াৰ পূর্বেও মহাকাশ পর্যটনত বিশেষ গুৰুত্ব প্রদান কৰি আহিছে জেফ বেজ’ছে৷ এই মিছনত অংশগ্রহণ কৰিবলগীয়া কেটী পেৰী হৈছে আমেৰিকাৰ এগৰাকী জনপ্রিয় সংগীত শিল্পী৷ আইছা হৈছে নাছাৰ এগৰাকী প্রাক্তন ৰকেট বিজ্ঞানী৷ সেইদৰে আমাণ্ডাও নাছাৰ মিছনৰ সৈতে জড়িত হৈ আছিল৷ গাইলে কিং এগৰাকী সাংবাদিক৷ কাৰিয়ানে ফ্লিন এগৰাকী ছবি প্রযোজক৷ লাওৰেন ছানছেজ হৈছে এমী বঁটা বিজয়ী এগৰাকী সাংবাদিক৷ অর্থাৎ বিভিন্ন ক্ষেত্রত সুনাম থকা এই ছগৰাকী মহিলাক মহাকাশলৈ প্রেৰণ কৰি এইবাৰ এক অভিলেখ গঢ়িবলৈ ওলাইছে জেফ বেজ’ছৰ ব্লু অৰিজিনে৷