🔹 ৪০গৰাকী লোকক জীৱন্তে উদ্ধাৰ
বিশেষ বাৰ্তা, ২৮ জুলাই : ফিলিপাইনছত নাও ডুবি কমপক্ষেও ২৬গৰাকী লোকৰ মৃত্যু হৈছে৷ কালি এই ঘটনা সংঘটিত হৈছে ৰাজধানীৰ সমীপৱর্তী এটা হ্রদত ৷ অত্যধিক যাত্রী কঢ়িওৱা নাওখন প্রচণ্ড বতাহৰ বাবে গভীৰ জলৰাশিত ডুব যায় বুলি আৰক্ষী সূত্রই সদৰী কৰিছে৷ ইফালে, ৪০গৰাকী লোকক জীৱন্তে উদ্ধাৰ কৰিছে উপকূলৰক্ষীয়ে৷ ইতিমধ্যে এই নাও দুর্ঘটনা সন্দর্ভত উপকূলৰক্ষীয়ে তদন্ত আৰম্ভ কৰিছে ৷ সংবাদ সংস্থা চিএনএনৰ প্রতিবেদন অনুসৰি, নাওখনৰ কেপ্টেইন আৰু অপাৰেটৰৰ বিৰুদ্ধে গোচৰ ৰুজু কৰা হৈছে ৷ মাত্র ৪০গৰাকী যাত্রী বহনৰ বাবে সক্ষম নাওখনত কিয় ৬০গৰাকীতকৈ অধিক যাত্রী কঢ়িওৱা হৈছিল, তাক লৈ প্রশ্ণৰ অৱতাৰণা হৈছে৷