বিশেষ বাৰ্তা, ২৩ মেঃ বিশ্ব টেষ্ট চেম্পিয়নশ্বিপৰ ফাইনেলত ভাৰতীয় দলৰ জার্ছী তৈয়াৰ কৰাৰ দায়িত্ব লাভ কৰিছে প্রখ্যাত ক্রীড়া সামগ্রী নির্মাণ সংস্থা এডিডাছে৷ এই সংস্থাটোৰ সৈতে পাঁচ বছৰৰ চুক্তি স্বাক্ষৰ কৰিলে ক্রিকেট ব’র্ডে৷ ব’ৰ্ডৰ তৰফৰ পৰা আনুষ্ঠানিকভাৱে এই কথা ঘোষণা কৰা হৈছে৷ ইয়াৰ লগে লগে ভাৰতীয় দলৰ জার্ছীও সলনি হ’ব৷ টেষ্ট বিশ্বকাপত বগা জার্ছীত থাকিব তেওঁলোকৰ ল’গো৷ ব’ৰ্ডৰ ফালৰ পৰা জনোৱা হৈছে যে এডিডাছে কেৱল ৰোহিত শর্মা, বিৰাট কোহলিহঁতৰ জার্ছীয়ে নহয়, হৰমনপ্রীত কৌৰহঁতৰ জার্ছীও তৈয়াৰ কৰিব৷ ভাৰতীয় ব’ৰ্ডৰ সচিব জয় শ্বাহে কয় যে, ক্রিকেটক আৰু আগুৱাই নিবলৈ আমি বদ্ধপৰিকৰ৷ ভাৰতীয় ক্রিকেটাৰসকলক আৰু ভাল প্রদর্শন কৰিবলৈ এই সংস্থাটোৱে উদ্বুদ্ধ কৰিব বুলিও তেওঁ অনুভৱ কৰে৷ ভাৰতীয় ব’ৰ্ডৰ জার্ছী স্পনছৰ সংস্থা এডিডাছৰ মুখ্য কার্যবাহী বিষয়া বন গুল্ডেনে কয়, ভাৰতীয় ক্রিকেট দলৰ সৈতে জড়িত হ’বলৈ পাই আমি গৌৰৱান্বিত৷ ভাৰতত ক্রিকেট হৈছে আটাইতকৈ গুৰুত্বপূর্ণ খেল৷ এনে এটি দলৰ সৈতে জড়িত হ’বলৈ পোৱাটো আমাৰ বাবে অতিশয় গুৰুত্বপূর্ণ৷ উল্লেখ্য যে বিশ্বকাপ বিজয়ী ফুটবল দল আর্জেণ্টিনাৰ সৈতেও যুক্ত হৈ আছে এডিডাছ৷ এতিয়া ভাৰতৰ পুৰুষ, মহিলা, অনূর্ধ্ব ১৯, ভাৰত এ আৰু বি দলৰো জার্ছী তৈয়াৰ কৰিব এই সংস্থাটোৱে৷ ব’ডৰ সূত্রই জনোৱা মতে অহা মাহৰ পৰা ২০২৮ৰ মার্চ পর্যন্ত এডিডাছ ভাৰতীয় ক্রিকেটৰ সৈতে জড়িত হৈ থাকিব৷ অহা ৭ জুনত ভাৰতীয় ক্রিকেট দলে এডিডাছে তৈয়াৰ কৰা নতুন জার্ছী পৰিধান কৰি খেলপথাৰত অৱতীর্ণ হ’ব৷