🔹 টেষ্ট ক্রিকেটত দ্রুত অর্ধশতক অৰ্জন কৰা বিদেশী খেলুৱৈ
নিউজ ডেস্ক, ৫ জানুৱাৰী : অষ্ট্রেলিয়াৰ মাটিত এক নতুন নজিৰ গঢ়িলে টীম ইণ্ডিয়াৰ তাৰকা উইকেটকীপাৰ–বেটাৰ ঋষভ পণ্টে৷ ছিডনী টেষ্টৰ দ্বিতীয় দিনা দ্বিতীয় ইনিংছত মাত্র ২৯টা বলত অর্ধশতক অর্জন কৰি অষ্ট্রেলিয়াৰ মাটিত টেষ্ট ক্রিকেটত দ্রুত অর্ধশতক কৰা বিদেশী খেলুৱৈ হিচাপে পৰিগণিত হয় ঋষভ৷ ভাৰতীয় দলটোৰ তাৰকা উইকেটকীপাৰ-বেটাৰগৰাকীয়ে ৰয় ফ্রেডেৰিকছৰ ৫০ বছৰ পুৰণি অভিলেখ ভংগ কৰি এক নতুন কীর্তিমান প্রতিষ্ঠা কৰে৷ ১৯৭৫ চনত ফ্রেডেৰিকছে ৩৩টা বলত অর্ধশতক অর্জন কৰিছিল৷ ইপিনে, অষ্ট্রেলিয়াৰ মাটিত টেষ্ট ক্রিকেটত ২৯টা বলত অর্ধশতক অর্জন কৰি দ্বিতীয় দ্রুত অর্ধশতক কৰাৰ গৌৰৱ অর্জন কৰে পণ্টে৷ পণ্টৰ পূর্বে ২০১৭ চনত অষ্ট্রেলিয়াৰ ডেভিদ ৱার্নাৰে পাকিস্তানৰ বিৰুদ্ধে খেলা ছিডনী টেষ্টত মাত্র ১৭টা বলত অর্ধশতক অর্জন কৰিছিল৷ আনহাতে, টেষ্ট ক্রিকেটত ঋষভ পণ্টৰ সেয়া আছিল দ্বিতীয় দ্রুত অর্ধশতক৷ ২০২২ চনত শ্রীলংকাৰ বিৰুদ্ধে ২৮টা বলত অর্ধশতক কৰিছিল উইকেটকীপাৰ-বেটাৰগৰাকীয়ে৷