নিয়মীয়া বাৰ্তা, ৩০ নৱেম্বৰঃ ক’ৰোনা ভাইৰাছৰ ভেকচিনৰ পৰীক্ষামূলক প্রয়োগৰ পাছত চেন্নাইৰ এজন ৪০ বছৰীয়া স্বেচ্ছাসেৱীৰ শৰীৰত গুৰুতৰ পার্শ্বক্রিয়া ঘটিছে৷ স্বয়ং ভুক্তভোগীজনে এই অভিযোগ তুলি ছিৰাম ইনষ্টিটিউট অৱ ইণ্ডিয়াৰ পৰা ৫ কোটি টকাৰ ক্ষতিপূৰণ দাবী কৰিছে৷
ইতিমধ্যে পুনেস্থিত ছিৰাম ইনষ্টিটিউট অৱ ইণ্ডিয়ালৈ আইনী জাননী প্রেৰণ কৰা হৈছে৷ অৱশ্যে তামিলনাডুৰ স্বাস্থ্যমন্ত্রীয়ে ভেকচিনবিধৰ পৰীক্ষামূলক প্রয়োগৰ ফলত পার্শ্বক্রিয়াৰ তথ্য লাভ কৰা নাই বুলি জনাইছে৷ অভিযোগ সন্দর্ভত তদন্ত কৰা হ’ব বুলি তেওঁ জনায়৷
উল্লেখ্য যে অক্সফ’ড বিশ্ববিদ্যালয় আৰু ব্রিটিছ ঔষধ প্রস্তুতকাৰক এষ্ট্রাজেনেকাৰ সহযোগত ছিৰাম ইণ্ডিয়াই ক’ভিশ্বিল্ডৰ পৰীক্ষামূলক প্রয়োগ কৰাৰ লগতে ব্যাপক হাৰত উৎপাদনৰো প্রস্তুতি চলাই ইতিমধ্যে আন্তঃগাঁথনি প্রায় সাজু কৰি তুলিছে৷ স্বেচ্ছাসেৱকজনে অভিযোগ কৰে যে ভেকচিন প্রয়োগৰ পাছত তেওঁৰ স্নায়ুতন্ত্রত ব্যাপক পার্শ্বক্রিয়া ঘটিছে৷ মানসিকভাৱেও তেওঁ গুৰুতৰভাৱে ভাগি পৰিছে৷ তেওঁ শীঘ্রেই ক’ভিশ্বিল্ডৰ পৰীক্ষামূলক প্রয়োগ, উৎপাদন আৰু বিতৰণ বন্ধ কৰিবলৈ আইনী জাননীযোগে দাবী জনাই আইনী ব্যৱস্থা গ্রহণৰ ভাবুকি দিয়ে৷ ইপিনে, ছিৰাম ইনষ্টিটিউট অৱ ইণ্ডিয়ায়ো স্বেচ্ছাসেৱকজনৰ এই গুৰুতৰ অভিযোগ নাকচ কৰিছে৷