বিশেষ বাৰ্তা, ৩০ মার্চঃ ৰোমাঞ্চ, ৰানৰ গতি, দুৰ্দান্ত কেটছ, চিয়েৰলিডাৰ্ছৰ নৃত্য। কি নাই ইয়াত, কি নিদিয়ে আইপিএলে। অপেক্ষাৰ অন্ত। কাইলৈৰ পৰা আইপিএল-২০২৩৷ প্রতিবাৰৰ দৰে এইবাৰো থাকিব প্রতিযোগিতাখনত বিভিন্ন চমক৷ কাইলৈ প্রথমখন মেচতে মুখামুখি হ’ব গুজৰাট টাইটানছ আৰু চাৰিবাৰৰ চেম্পিয়ন চেন্নাই ছুপাৰ কিংছ৷ অর্থাৎ উদ্বোধনী মেচত হার্ডিক পাণ্ডিয়াৰ বিৰুদ্ধে যুঁজ দিব এম এছ ধোনীয়ে৷ প্রতিবাৰৰ দৰে এইবাৰো ব্লকব্লাষ্টাৰ মেচৰ জৰিয়তে আৰম্ভ হ’ব আইপিএল৷ এইবাৰ প্রতিযোগিতাখনত কেইবাটাও নতুন নিয়ম প্রযোজ্য হ’ব৷ এই নিয়মে সলনি কৰি দিব পাৰে ২০ অভাৰৰ প্রতিযোগিতাখনৰ যাৱতীয় কৌশল৷ উল্লেখ্য যে প্রথমবাৰৰ বাবে আইপিএলৰ দুখন মেচ অনুষ্ঠিত হ’ব গুৱাহাটীত৷ ৰাজস্থান ৰয়েলছৰ হোম গ্রাউণ্ডৰূপে নির্ধাৰণ কৰা গুৱাহাটীত বর্ষাপাৰা ষ্টেডিয়ামত দলটোৱে পঞ্জাৱ কিংছৰ বিপক্ষে ৫ এপ্রিলত প্রথমখন মেচত অৱতীর্ণ হ’ব৷ আনহাতে ৮ এপ্রিলত গুৱাহাটীত ৰাজস্থানৰ দ্বিতীয়খন মেচ অনুষ্ঠিত হ’ব দিল্লী কেপিটেলছৰ বিপক্ষে৷ কাইলৈ আইপিএলৰ উদ্বোধনী মেচখন অনুষ্ঠিত হ’ব আহমেদাবাদৰ নৰেন্দ্র মোদী ষ্টেডিয়ামত৷ সন্ধিয়া ৭.৩০ বজাৰ পৰা উদ্বোধনী মেচ অনুষ্ঠিত হোৱাৰ পূর্বে আয়োজন কৰা হৈছে আকর্ষণীয় উদ্বোধনী অনুষ্ঠান৷ উল্লেখ্য যে আৰম্ভণিৰ পৰাই আইপিএলত জাকজমকীয়া উদ্বোধনী অনুষ্ঠানৰ আয়োজন কৰা হৈছিল৷ কিন্তু ক’ভিডৰ বাবে বিগত তিনি বছৰ অনুষ্ঠিত হোৱা নাছিল উদ্বোধনী অনুষ্ঠান৷ এইবাৰ পুনৰ জাক জমকতাৰে আয়োজন কৰা উদ্বোধনী অনুষ্ঠান আৰম্ভ হ’ব সন্ধিয়া ৬ বজাৰ পৰা৷ এই অনুষ্ঠানত বলিউডৰ অসংখ্য তাৰকা, শিল্পী আৰু অভিনেতা–ভিনেত্রীয়ে অংশগ্রহণ কৰিব৷ জানিব পৰা মতে তাৰকা কণ্ঠশিল্পী অৰিজিৎ সিঙে গীত পৰিৱেশন কৰাৰ লগতে মঞ্চ কঁপাব কেটৰিনা কাঈফ, ৰশ্মিতা মান্ধানা, তামান্না ভাটিয়া আদি অভিনেত্রীয়ে৷