নিয়মীয়া বাৰ্তা ডিজিটেল, ১৭ জানুৱাৰীঃ আল-কাদিৰ ট্ৰাষ্টৰ সৈতে জড়িত ভূমি দুৰ্নীতিৰ গোচৰত পাকিস্তানৰ প্ৰাক্তন প্ৰধানমন্ত্ৰী ইমৰান খানক ১৪ বছৰৰ কাৰাদণ্ড বিহা হৈছে। ইয়াৰ উপৰি বুছৰা বিবিক ৭ বছৰৰ কাৰাদণ্ড বিহা হৈছে। আৰ্য নিউজৰ প্ৰতিবেদন অনুসৰি ২০২৩ চনৰ আগষ্ট মাহৰ পৰা ইমৰান খান কাৰাগাৰত বন্দী হৈ থকা ৰাৱালপিণ্ডিৰ দুৰ্নীতিবিৰোধী আদালতত এই সিদ্ধান্ত লোৱা হৈছে। এই গোচৰত খানৰ বিৰুদ্ধে তেওঁৰ পত্নী বুছৰা বিবি আৰু আন ছয়জন লোকৰ বিৰুদ্ধে অভিযোগ উত্থাপন কৰা হৈছিল, যাৰ অধিকাংশই দেশৰ বাহিৰত। আদিলা জেলত স্থাপন কৰা অস্থায়ী আদালতত ন্যায়াধীশ নাছিৰ জাভেদ ৰাণাই এই ৰায় ঘোষণা কৰে। এই সিদ্ধান্ত তিনিবাৰ পিছুৱাই দিয়া হৈছিল। ৰাষ্ট্ৰীয় জবাবদিহিতা ব্যুৰোৱে (এন এ বি) ২০২৩ চনৰ ডিচেম্বৰ মাহত খান আৰু অন্যান্যসকলৰ বিৰুদ্ধে গোচৰ ৰুজু কৰি ৰাষ্ট্ৰীয় ৰাজকোষত ১৯ কোটি পাউণ্ড (প্ৰায় ৫০ বিলিয়ন পি এ কে) লোকচান কৰাৰ অভিযোগ উত্থাপন কৰিছিল। আল-কাদিৰ ট্ৰাষ্টৰ দুৰ্নীতিৰ গোচৰটো পাকিস্তানৰ ইতিহাসত আৰ্থিক অন্যায়ৰ অন্যতম বৃহৎ গোচৰ। এই গোচৰত অভিযোগ উত্থাপন হৈছে যে ইমৰান খান আৰু তেওঁৰ পত্নীয়ে এজন সম্পত্তিৰ টাইকুনৰ সৈতে মিলি চৰকাৰী ধনৰ অপব্যৱহাৰ কৰিছিল। অৱশ্যে ইমৰান খান আৰু বুছৰা বিবিৰ বাহিৰে আন অভিযুক্তসকল দেশৰ বাহিৰত থকাৰ বাবে কেৱল খান আৰু বিবিৰ বিৰুদ্ধে বিচাৰ মুকলি হৈ আছে। আল কাদিৰ ট্ৰাষ্টৰ দুৰ্নীতিৰ গোচৰটো পাকিস্তানৰ অন্যতম বিতৰ্কিত গোচৰ, য’ত ৫০ বিলিয়ন পাকিস্তানী টকাৰ অপব্যৱহাৰৰ অভিযোগ উত্থাপন হৈছে। ব্ৰিটেইনৰ নেশ্যনেল ক্ৰাইম এজেন্সীয়ে পাকিস্তানলৈ এই ধন ঘূৰাই দিছিল যদিও সম্পত্তিৰ টাইকুনৰ ব্যক্তিগত সুবিধাৰ বাবে মুকলি কৰি দিয়া বুলি অভিযোগ উঠিছে। এই ধনেৰে বুছৰা বিবি আৰু ইমৰান খানে যৌথভাৱে প্ৰতিষ্ঠা কৰা ঝেলুমৰ আল-কাদিৰ বিশ্ববিদ্যালয়ৰ বাবে মাটি অধিগ্ৰহণ কৰা হৈছিল। আল কাদিৰ ট্ৰাষ্টৰ ট্ৰাষ্টী বুছৰা বিবি। এই চুক্তিৰ ব্যক্তিগত সুবিধা লোৱাৰ অভিযোগ তেওঁৰ বিৰুদ্ধে। ট্ৰাষ্টৰ অধীনত ৪৫৮ কানাল মাটি অধিগ্ৰহণ কৰা হৈছিল আৰু এই মাটি বিশ্ববিদ্যালয়খন নিৰ্মাণৰ বাবে ব্যৱহাৰ কৰা হৈছিল অভিযোগ অনুসৰি ৰাষ্ট্ৰীয় কোষাগাৰৰ বাবে নিৰ্ধাৰিত এই ধন ব্যক্তিগত প্ৰকল্পলৈ চাইফন কৰা হৈছিল। এই বিশ্ববিদ্যালয়খন স্থাপন কৰাত ইমৰান খান আৰু বুছৰা বিবিক সহায় কৰা বুলি অভিযোগ উত্থাপন কৰা হৈছে যে এই সহযোগিতা ধনৰ অপব্যৱহাৰ আৰু ব্যক্তিগত লাভৰ বাবে কৰা হৈছিল। এই গোচৰত ৰাৱালপিণ্ডিৰ দুৰ্নীতিবিৰোধী আদালতে ইমৰান খানক ১৪ বছৰৰ কাৰাদণ্ড বিহে। ৰাষ্ট্রীয় কোষাগাৰত লোকচান কৰাৰ উদ্দেশ্যেৰে এই ধনৰ অপব্যৱহাৰ কৰা বুলি আদালতে থিৰাং কৰে৷ এই বিষয়টো ইমৰান খানৰ বাবে এক ডাঙৰ ৰাজনৈতিক বিপৰ্যয়। পাকিস্তানত দুৰ্নীতিবিৰোধী অভিযানৰ দিশত এয়া এক গুৰুত্বপূৰ্ণ পদক্ষেপ। এই ৰায়দানৰ ফলত পাকিস্তানৰ ৰাজনীতি আৰু চৰকাৰী স্বচ্ছতাৰ ওপৰত ব্যাপক প্ৰভাৱ পৰিব পাৰে, যাৰ ফলত অধিক আইনী ব্যৱস্থা গ্ৰহণৰ সম্ভাৱনা বৃদ্ধি পাব পাৰে।