আইচিচি ইমার্জিং বর্ষশ্রেষ্ঠৰ ক্রিকেটাৰৰ দৌৰত যশস্বী জয়ছোৱাল
বাৰ্তা ডিজিটেল ডেস্ক, ৬ জানুৱাৰীঃ আইচিচিৰ বর্ষশ্রেষ্ঠ খেলুৱৈৰ দৌৰত স্থান লাভ কৰিছে ভাৰতৰ দুগৰাকী খেলুৱৈয়ে৷ ২০২৩ বর্ষৰ ছাৰ গাৰফিল্ড ছ’বার্ছ ট্রফীৰ বাবে চাৰিগৰাকী ক্রিকেটাৰ মনোনীত হৈছে আৰু ইয়াৰে ভিতৰত দুগৰাকীয়েই হ’ল ভাৰতীয় খেলুৱৈ৷ আইচিচিৰ বর্ষশ্রেষ্ঠ খেলুৱৈৰ দৌৰত স্থান লাভ ভাৰতীয় দলটোৰ খেলুৱৈ দুগৰাকী হ’ল তাৰকা বেটাৰ বিৰাট কোহলি আৰু অলৰাউণ্ডাৰ ৰবীন্দ্র জাদেজা৷ ইয়াৰ উপৰি এই ট্রফীৰ বাবে মনোনীত আন দুগৰাকী খেলুৱৈ হ’ল বিশ্ব চেম্পিয়ন অষ্ট্রেলিয়াৰ অধিনায়ক পেট কামিনছ আৰু বিশ্বকাপৰ ফাইনেলৰ নায়ক ট্রেভিছ হেড৷ উল্লেখ্য যে সদ্যসমাপ্ত এদিনীয়া বিশ্বকাপত ৭৬৫ ৰান কৰি কোহলিয়ে শ্রেষ্ঠ বেটাৰৰ সন্মান লাভ কৰিছিল৷ ইফালে ২০২৩ বর্ষত অলৰাউণ্ডাৰ জাদেজাৰো প্রদর্শন আছিল চমকপ্রদ৷ জাদেজাই বছৰটোত ৬৬টা উইকেট দখল কৰাৰ লগতে ৬১৩ ৰানো কৰিবলৈ সক্ষম হৈছিল৷ আনহাতে কামিনছৰ নেতৃত্বত অষ্ট্রেলিয়াই ২০২৩ বর্ষত বিশ্ব টেষ্ট চেম্পিয়নছশ্বিপৰ লগতে এদিনীয়া বিশ্বকাপৰ খিতাপ জয় কৰে৷ পেচবলাৰগৰাকীয়ে টেষ্ট আৰু এদিনীয়াত ৫৯টা উইকেট দখল কৰে৷ আনহাতে ট্রেভিছ হেডে বিশ্বকাপৰ ফাইনেলত দুর্দান্ত ইনিংছ খেলি অষ্ট্রেলিয়াক চেম্পিয়নৰ সোৱাদ দিয়াত মুখ্য ভূমিকা পালন কৰিছিল৷ ইফালে আইচিচি বর্ষশ্রেষ্ঠ এদিনীয়া ক্রিকেটাৰৰ বাবে মনোনীত চাৰিগৰাকী খেলুৱৈৰ ভিতৰত তিনিগৰাকী ভাৰতীয়ই স্থান লাভ কৰিছে৷ ভাৰতৰ শুভমন গিল, বিৰাট কোহলি আৰু মহম্মদ ছামি মনোনীত হোৱাৰ বিপৰীতে চতুর্থগৰাকী হিচাপে এই বঁটাৰ দৌৰত আছে নিউজিলেণ্ডৰ ডাৰিল মিচেল৷ আনহাতে বর্ষশ্রেষ্ঠ টেষ্ট ক্রিকেটাৰৰ দৌৰত ভাৰতৰ ৰবিচন্দ্রন অশ্বিনৰ লগতে স্থান লাভ কৰিছে অষ্ট্রেলিয়াৰ ট্রেভিছ হেড আৰু ওছমান খাৱাজা আৰু ইংলেণ্ডৰ জ’ ৰুট৷ বর্ষশ্রেষ্ঠ টি–২০ ক্রিকেটাৰৰ বাবে মনোনীত চাৰিগৰাকী খেলুৱৈৰ ভিতৰত ভাৰতৰ সূর্য কুমাৰ যাদৱে স্থান লাভ কৰিছে৷ আইচিচি ইমার্জিং বর্ষশ্রেষ্ঠৰ ক্রিকেটাৰৰ দৌৰত আছে ভাৰতৰ যশস্বী জয়ছোৱাল৷