পাকিস্তানত বকৰি-ঈদ পালনত নিষেধাজ্ঞা, কুৰবানী দিলেই ৫ লাখ টকা জৰিমনা

পাকিস্তানত বকৰি-ঈদ পালনত নিষেধাজ্ঞা, কুৰবানী দিলেই ৫ লাখ টকা জৰিমনা

নিউজ ডেস্ক, ৬ জুন : পাকিস্তানত বসবাস কৰা আহমদিয়া মুছলমান সম্প্ৰদায়ে মহম্মদ আলী জিন্না আৰু মুছলিম লীগক সমৰ্থন কৰি দেশ গঠনত ঐতিহাসিক অৱদান আগবঢ়াইছিল। আজি একেখন দেশতে ধৰ্মীয়, সামাজিক আৰু আইনী নিৰ্যাতনৰ বলি হৈছে। কাইলৈ পাকিস্তানত ঈদ-উল-আজহা উদযাপন হ’ব, কিন্তু আহমদিয়া জনগোষ্ঠীৰ বাবে এই উৎসৱ এতিয়া ভয় আৰু চাপৰ প্ৰতীক হৈ পৰিছে।

ক্ষতিপূৰণৰ বণ্ডত স্বাক্ষৰ

পঞ্জাৱ আৰু সিন্ধ প্ৰদেশত আৰক্ষী আৰু প্ৰশাসনে আহমদিয়া জনগোষ্ঠীক ভাবুকি দিছে। শপতনামা আৰু ক্ষতিপূৰণৰ বণ্ডত স্বাক্ষৰ ল’বলৈ আটক কৰি ৰখা হৈছে। আনকি দেৱালৰ ভিতৰত বলিদান নিষিদ্ধ কৰাৰ ভাবুকিও দিয়া হৈছে। শপতনামাত ঈদ-উল-আজহাৰ কোনো ধৰ্মীয় অনুষ্ঠানত অংশগ্ৰহণ নকৰাৰ শপত গ্ৰহণৰ কথা উল্লেখ আছে। তেনে নকৰিলে ৫ লাখ পিকেআৰ জৰিমনা বিহাও অন্তৰ্ভুক্ত। এই আদেশ ২০২৩ চনৰ অধিসূচনাৰ ভিত্তিত কাৰ্যকৰী কৰা হৈছে। লাহোৰ ফ্ৰাইডে টাইমছৰ প্ৰতিবেদন অনুসৰি এনে শপতনামাত জোৰকৈ স্বাক্ষৰ কৰাটো অসাংবিধানিক আৰু ই স্থানীয় কৰ্তৃপক্ষৰ অধিকাৰক্ষেত্ৰৰ বাহিৰত।

পাকিস্তানত মানৱ অধিকাৰ উলংঘা

১৯৭৪ চনত পাকিস্তানত সংবিধান সংশোধনীত আহমদিয়া সম্প্ৰদায়ক মুছলমান স্বীকৃতিৰ পৰা বাদ দিয়া হৈছিল। আহমদিয়া সম্প্ৰদায়ৰ লোকসকলক ৰাজহুৱা স্থানত কোৰআন পঢ়া, নামাজ কৰা, চালাম কোৱা, আনকি মছজিদ নিৰ্মাণৰ ক্ষেত্ৰতো নিষেধাজ্ঞা আৰোপ কৰা হৈছে। তেনে কৰিলে তেওঁলোকক জেলত ভৰোৱা হয়।

আহমদীয়া সমাজে কবৰতো শান্তি নাপায়

২০২৫ চনৰ মাৰ্চ মাহত পঞ্জাৱৰ খুছাবত তেহৰিক-ই-লাব্বাইক পাকিস্তান (টিএলপি) আৰু টিটিপিয়ে ১০০ৰো অধিক আহমদিয়াৰ কবৰ ভাঙি পেলাইছিল। টিটিপি আৰু অন্যান্য উগ্ৰপন্থী সংগঠনসমূহে অহৰহ আহমদীসকলক লক্ষ্য কৰি লৈছে। এমনে্ষ্টী ইণ্টাৰনেশ্যনেলৰ তথ্য অনুসৰি ২০২৪ চনৰ জুন মাহত কমেও ৩৬জনক গ্ৰেপ্তাৰ কৰা হৈছিল যাতে তেওঁলোকে ঈদৰ অনুষ্ঠান পালন কৰিব নোৱাৰে।