🔹 আইএনএছ টার্কাশৰ মেৰিন কমাণ্ডাৰৰ নেতৃত্বত অভিযান
নিউজ ডেস্ক, ৩ এপ্রিল : নৌ বাহিনীৰ জাহাজ আইএনএছ টার্কাশৰ বৃহৎ সাফল্য৷ ভাৰত মহাসাগৰত নজৰদাৰী কৰি ২৫০০ কেজিৰো অধিক ড্রাগছ জব্দ কৰিছে নৌ সেনাই৷ ৩১ মার্চত আইএনএছ টার্কাশত খবৰ দিয়ে নৌ বাহিনীৰ এখন আকাশীযানে৷ আকাশৰ পৰা নজৰদাৰী চলোৱাৰ সময়ত সন্দেহজনক নৌ যানৰ গতি–বিধি নজৰত পৰে নৌ সেনাৰ৷ খবৰ পোৱাৰ লগে লগে যাত্রা পথ পৰিৱর্তন কৰি সন্দেহজনক নৌ যানখনৰ দিশলৈ অগ্রসৰ হয় নৌ সেনাৰ ৰণতৰী আইএনএছ টার্কাশে৷ মেৰিন কমাণ্ডাৰৰ নেতৃত্বত সন্দেহজনক নৌ যানখনত তালাচী চলোৱাৰ সময়ত এই বৃহৎ পৰিমাণৰ ড্রাগছ জব্দ হয়৷ জব্দ হোৱা ড্রাগছৰ ভিতৰত আছে ২৩৮৬ কেজি হাচিশ আৰু ১২১ কেজি হেৰ’ইন৷ নৌ যানখনৰ পৰা গ্রেপ্তাৰ কৰা হয় ড্রাগছ সৰবৰাহকাৰী কেইবাজনো অভিযুক্তক৷ ইতিমধ্যে গ্রেপ্তাৰ হোৱা লোকসকলক জেৰা কৰি থকা হৈছে৷ আন্তর্জাতিক জল সীমাত অবৈধ কার্যকলাপ বন্ধ কৰাৰ লক্ষ্যৰে আইএনএছ টার্কাশৰ দৰে ৰণতৰীক নজৰদাৰীৰ দায়িত্ব দিয়া হৈছিল৷ সেই নজৰদাৰীত সাফল্য পোৱা গ’ল৷ স্মর্তব্য যে আন্তর্জাতিক ড্রাগছ সৰবৰাহকাৰী চক্রই বিভিন্ন সময়ত সমুদ্র পথেৰে ভাৰতলৈ সৰবৰাহ কৰি আহিছে হাজাৰ হাজাৰ কোটি টকাৰ নিষিদ্ধ ড্রাগছ৷ বিগত সময়ছোৱাত গুজৰাটৰ সমুদ্র বন্দৰকে ধৰি দেশৰ বিভিন্ন চহৰত জব্দ হৈছে কেইবা হাজাৰ কোটি টকাৰ ড্রাগছ৷ আনকি দেশৰ ৰাজধানী দিল্লীতো জব্দ হৈছে বৃহৎ পৰিমাণৰ ড্রাগছ৷ এই ড্রাগছ সৰবৰাহৰ ক্ষেত্রত বৃহৎ এক আন্তর্জাতিক চক্র জড়িত হৈ থকা বুলি নিশ্চিত কৰিছে চোৰাংচোৱাই৷ চোৰাংচোৱাৰ তথ্য লাভৰ পিছতে কেন্দ্রীয় চৰকাৰে ড্রাগছৰ সৰবৰাহ আৰু অপৰাধীৰ অনুপ্রৱেশত প্রতিৰোধ লগাবলৈ বিভিন্ন বাহিনীক নজৰদাৰীৰ দায়িত্ব প্রদান কৰিছে৷ সমুদ্রত নৌ সেনা আৰু উপকূলৰক্ষীয়ে এইক্ষেত্রত গুৰুত্বপূর্ণ ভূমিকা পালন কৰি আহিছে৷ ইয়াৰ পূর্বেও অনুৰূপ ধৰণে ড্রাগছ সৰবৰাহকাৰীক গ্রেপ্তাৰ কৰিবলৈ সক্ষম হৈছে উপকূলৰক্ষী৷ উপকূলৰক্ষীয়ে বিভিন্ন সময়ত নৌ সেনাৰ সৈতে যৌথভাৱে অভিযান চলাই আহিছে৷ এইবাৰ নৌ সেনাই একক প্রচেষ্টাৰে এই বৃহৎ পৰিমাণৰ ড্রাগছ জব্দ কৰিবলৈ সক্ষম হৈছে৷ শেহতীয়াকৈ জব্দ হোৱা ড্রাগছৰ আন্তর্জাতিক বজাৰ মূল্য কেইবা হাজাৰ কোটি টকা হ’ব বুলি নৌ সেনাৰ এগৰাকী বিষয়াই সংবাদ মাধ্যমক জনাইছে৷