ছানিয়াৰে বিচ্ছেদৰ জল্পনা-কল্পনাৰ মাজতে ছানা জাভেদৰে পুনৰ এক নতুন ইনিংছ ছোৱেইব মালিকৰ

বিশেষ বাৰ্তা, ২০ জানুৱাৰী : জীৱনৰ আন এক নতুন ইনিংছ আৰম্ভ কৰিলে পাকিস্তান ক্ৰিকেট দলৰ প্ৰাক্তন অধিনায়ক ছোৱেইব মালিকে। ছোৱেইব মালিকক লৈ চৰ্চিত এক উৰাবাতৰি সঁচা হ’ল। পাকিস্তান ক্ৰিকেট দলৰ প্ৰাক্তন অধিনায়ক ছোৱেইব মালিক পাকিস্তানী অভিনেত্ৰী ছানা জাভেদৰ সৈতে বিবাহপাশত আবদ্ধ হ’ল। ছ’চিয়েল মিডিয়াত বিয়াৰ খবৰটো নিজেই দিলে ছোৱেইবে। যোৱা বছৰ ক্ৰিকেটাৰগৰাকীৰ নতুন সংগী ছানা জাভেদৰ বিবাহ বিচ্ছেদ হৈছিল।উল্লেখ্য যে ভাৰতৰ তাৰকা টেনিছ খেলুৱৈ ছানিয়া মিৰ্জাৰ সৈতেও বিবাহপাশত আবদ্ধ হৈছিল ছোৱেইব মালিক। ছোৱেইব-ছানিয়াৰ বিয়াখন সাধুকথাৰ দৰে আছিল। অষ্ট্ৰেলিয়াত খেলি থকাৰ সময়তে ছোৱেইব-ছানিয়াৰ মাজত সম্পৰ্ক গঢ় লৈ উঠিছিল। তাৰ পিছত দুয়ো বিবাহপাশত আবদ্ধ হয়। অৱশ্য়ে পাকিস্তানত বৈবাহিক জীৱন কটোৱাটো ছানিয়াৰ বাবে কঠিন হৈ পৰে। ছোৱেইবৰ দেশৰ ৰক্ষণশীল সমাজত নিজে চলিবলৈ ছানিয়াই অস্বত্বিবোধ কৰিছিল। পিছত ক্ৰমান্বয়ে দুয়োগৰাকী তাৰকাৰ মাজত সংঘাতৰ সৃষ্টি হৈছিল। যোৱা কেইবছৰমানৰ পৰা তেওঁলোকৰ সম্পৰ্কক লৈ জল্পনা-কল্পনা বাঢ়ি আহিছিল। ইয়াৰ মাজতে অভিনেত্ৰী ছানাৰ সৈতে ছোৱেইবৰ সম্পৰ্কৰ খবৰ বিয়পি পৰে। এতিয়া ছানিয়া ছোৱেইবৰ বাবে অতীত। অৱশ্যে কিছুদিন পূৰ্বে ছানিয়াৰ ছ’চিয়েল মিডিয়া পোষ্টত ব্ৰেকআপৰ ইংগিত পোৱা গৈছিল। অৱশ্যে ছোৱেইবে ছানিয়াৰ সৈতে বিবাহ বিচ্ছেদ কৰিছে নে নাই, সেয়া আনুষ্ঠানিকভাৱে ঘোষণা কৰা নাই।