🔹 ইউৰোপীয় দেশৰ চৰকাৰৰ সিদ্ধান্তক লৈ বিশ্বজুৰি প্রতিক্রিয়া
নিউজ ডেস্ক, ৪ এপ্রিল : এজন ব্যক্তিক আক্রমণ কৰিছিল ভালুকে৷ অৰণ্য অঞ্চলত খোজকাঢ়ি থকা অৱস্থাত ভালুকৰ আক্রমণত মৃত্যু হৈছিল ব্যক্তিগৰাকীৰ৷ ইয়াৰ পিছতেই দেশখনৰ কেবিনেটে গ্রহণ কৰা এটা সিদ্ধান্তক লৈ চাঞ্চল্যৰ সৃষ্টি হৈছে ইউৰোপজুৰি৷ শ্লোভাকিয়াৰ অৰণ্যত ব্যক্তিগৰাকীৰ মৃত্যু হোৱাৰ পিছত দেশখনৰ মন্ত্রীসভাই এটা প্রস্তাৱত অনুমোদন জনায়৷ এই প্রস্তাৱ অনুসৰি, দেশখনৰ অৰণ্যত থকা ৩৫০টা দুষ্প্রাপ্য প্রজাতিৰ ভালুকক গুলীয়াই হত্যা কৰা হ’ব৷ অর্থাৎ দেশখনত থকা ব্লাউন বিয়েৰৰ এক চতুর্থাংশক গুলীয়াই হত্যা কৰাৰ সিদ্ধান্ত লৈছে চৰকাৰে৷ প্রধানমন্ত্রী ৰবার্ট ফিকোৰ ৰাষ্ট্রীয়তাবাদী চৰকাৰে উল্লেখ কৰিছে যে মানৱ জাতিৰ বাবে ক্রমাৎ বিপজ্জনক হৈ পৰিছে অৰণ্যত থকা ভালুকবোৰ৷ উল্লেখনীয় যে এই প্রজাতিৰ ১,৩০০টা ভালুক আছে দেশখনৰ অৰণ্যত৷ তাৰ ভিতৰত ৩৫০টা নিধন কৰাৰ সিদ্ধান্ত লৈছে চৰকাৰে৷ প্রধানমন্ত্রী ফিকোৱে উল্লেখ কৰে যে অৰণ্য অঞ্চলত মানুহৰ বিচৰণ অধিক বিপজ্জনক হৈ পৰিছে৷ এনে পৰিস্থিতিত হিংস্র প্রকৃতিৰ ৩৫০টা ভালুক নিধন কৰাৰ সিদ্ধান্ত লোৱা হৈছে৷ শ্লোভাকিয়াৰ ৭৯খন জিলাত ইতিমধ্যে বিশেষ জৰুৰী অৱস্থা জাৰি কৰা হৈছে৷ এই জিলাসমূহত মানুহৰ বসতি অঞ্চলত বিচৰণ কৰা ভালুকবোৰ হত্যা কৰাৰ বাবে চৰকাৰে ব্যৱস্থা হাতত লৈছে৷ ইফালে, প্রাণী সুৰক্ষা সংগঠনসমূহে চৰকাৰৰ এই সিদ্ধান্তক কঠোৰ ভাষাৰে গৰিহণা দিছে৷ স্মর্তব্য যে যোৱা বছৰো শ্লোভাকিয়া চৰকাৰে ৯৩টা ভালুক গুলীয়াই হত্যা কৰিছিল৷ এই ঘটনাক লৈও বিশ্বৰ পৰিৱেশ সংগঠনসমূহে গৰিহণা দিছিল শ্লোভাকিয়াক৷