বিশেষ বাৰ্তা, ২৬ জুনঃ ৩৫০জন যাত্ৰী লৈ লণ্ডনৰ পৰা দিল্লীলৈ উৰা মাৰিছিল এয়াৰ ইণ্ডিয়াৰ এখন বিমান। বেয়া বতৰৰ বাবে বিমানখন দিল্লীৰ পৰিৱৰ্তে জয়পুৰ বিমানবন্দৰত জৰুৰীকালীন অৱতৰণ কৰিবলগীয়া হয়। দিল্লী এ টি চিৰ পৰা ২ ঘণ্টা পিছত ক্লিয়াৰেন্স পোৱাৰ পিছত যাত্ৰীসকলক লৈ বিমানখন সাজু হয় যদিও পাইলটজনে জয়পুৰ বিমানবন্দৰৰ পৰা দিল্লীলৈ যাত্ৰীসকলক লৈ উৰা মাৰিবলৈ অস্বীকাৰ কৰে। কাৰণ হিচাপে তেওঁ জনায়- তেওঁৰ কৰ্তব্যৰ সময় শেষ। নিৰ্ধাৰিত সময়সীমাৰ পিছত কাম কৰিব কিয়? ইয়াৰ পৰিপ্ৰেক্ষিতত দেওবাৰে প্ৰায় পাঁচ ঘণ্টা ধৰি জয়পুৰ বিমানবন্দৰত আবদ্ধ হৈ পৰে এয়াৰ ইণ্ডিয়াৰ এ আই-১১২ বিমানখনৰ ৩৫০জন যাত্ৰী। সংবাদ মাধ্যমৰ বাতৰি অনুসৰি, দেওবাৰে এয়াৰ ইণ্ডিয়াৰ বিমানখনে লণ্ডনৰ পৰা দিল্লীলৈ যাত্ৰা আৰম্ভ কৰে। পুৱা প্ৰায় ৪ বজাত দিল্লী বিমানবন্দৰত অৱতৰণ কৰাৰ কথা আছিল বিমানখন।