নিউজ ডেস্ক, ১৫ ডিচেম্বৰ : শুকুৰবাৰে ইমাদ ৱাছিম, শনিবাৰে মহম্মদ আমীৰ৷ মাত্র দুদিনৰ ব্যৱধানত আন্তঃৰাষ্ট্রীয় ক্রিকেটক বিদায় জনালে দুই পাকিস্তানী ক্রিকেটাৰে৷ দুয়োগৰাকী ক্রিকেটাৰে ছ’চিয়েল মিডিয়াত নিজৰ সিদ্ধান্তৰ কথা ঘোষণা কৰে৷ দুয়োজনে পূর্বে অৱসৰ গ্রহণ কৰি আন্তঃৰাষ্ট্রীয় ক্রিকেটলৈ পুনৰ ঘূৰি আহিছিল৷ জাতীয় দলত স্থান সুৰক্ষিত কৰিব নোৱাৰাৰ বাবেই ৱাছিম আৰু আমীৰে অৱসৰ লোৱাৰ সিদ্ধান্ত গ্রহণ কৰে৷ উল্লেখ্য যে বিগত বছৰত ৱাছিমে ক্রিকেটৰ পৰা অৱসৰ লৈছিল যদিও টি–২০ বিশ্বকাপৰ পূর্বে পুনৰ জাতীয় দললৈ প্রত্যাৱর্তন কৰিছিল৷ আনহাতে, ২০১০ চনত মেচ ফিক্সিঙৰ অভিযোগত ৫ বছৰৰ বাবে নিষেধাজ্ঞাৰ সন্মুখীন হোৱা আমীৰে ২০১৭ চনত পুনৰ পাক দললৈ ঘূৰি আহিছিল৷