আইএছআইৰ ‘হানী ট্রেপ’ৰ ষড়যন্ত্র ভাৰতত

নিয়মীয়া বাৰ্তা, ৩১ ডিচেম্বৰঃ হানী ট্র্রেপ’ৰ জৰিয়তে ভাৰতীয় নিৰাপত্তা বাহিনীৰ কর্মীক জালত পেলোৱাৰ ষড়যন্ত্র ৰচিছে পাকিস্তানী চোৰাংচোৱা সংস্থা আইএছআয়ে৷ কেন্দ্রীয় গৃহ মন্ত্রণালয়ৰ এক সূত্রৰ উদ্ধৃতি দি এই তথ্য সদৰী কৰিছে সংবাদ সংস্থা জি নিউজে৷ ইতিমধ্যে এই ষড়যন্ত্রৰ নেতৃত্ব লাভ কৰিছে আইএছআইৰ এগৰাকী জ্যেষ্ঠ বিষয়াই৷ সূত্রটোৱে সদৰী কৰা অনুসৰি শীঘ্রে ৰাষ্ট্রীয় অনুসন্ধান সংস্থা(নিয়া)ই পাকিস্তানী চোৰাংচোৱা সংস্থাটোৰ এই ষড়যন্ত্র সন্দর্ভত সবিশেষ তথ্য সদৰী কৰিব৷ উল্লেখনীয় যে ছ’চিয়েল মিডিয়া প্লেটফর্ম ফেচবুক, ইনষ্টাগ্রাম আদিৰ জৰিয়তে ভাৰতীয় নিৰাপত্তা বিষয়াসকলক এই হানী ট্রেপৰ চিকাৰ কৰিবলৈ ষড়যন্ত্র চলোৱা বুলি গৃহ মন্ত্রণালয়ৰ এগৰাকী জ্যেষ্ঠ বিষয়ববীয়াই জি নিউজক জনাইছে৷ লক্ষণীয়ভাৱে আইএছআইৰ এই ষড়যন্ত্রৰ তথ্য ভাৰতীয় চোৰাংচোৱাৰ হাতত পৰাৰ পিছতে সশস্ত্র বাহিনীবোৰত ছ’চিয়েল মিডিয়াৰ ব্যৱহাৰ সন্দর্ভত প্রশ্ণৰ অৱতাৰণা হৈছে৷ ইতিমধ্যে ভাৰতীয় নৌসেনাই কর্তব্যৰ সময়ত ছ’চিয়েল মিডিয়াৰ ব্যৱহাৰ নিষিদ্ধ কৰিছে৷ গতিকে অন্য সশস্ত্র বাহিনীসমূহতো একেই ব্যৱস্থা গ্রহণ কৰা হ’ব নেকি তাক লৈ প্রতিৰক্ষা মন্ত্রণালয়ৰ তৰফৰ পৰা চিন্তা–চর্চা চলি থকা বুলি সংবাদ মাধ্যমে প্রকাশ কৰিছে৷