নিয়মীয়া বার্তা, ১১ মেঃ দেশজুৰি বলৱৎ হৈ থকা তৃতীয় পর্যায়ৰ লকডাউনৰ পাছত ক’ৰোনা ভাইৰাছ সংক্রমণ ৰুধিবৰ বাবে কেন্দ্রীয় চৰকাৰৰ পৰিকল্পনা কি হ’ব? এই দিশত আলোচনা কৰিবৰ বাবে আজি বিয়লি ৩ বজাত প্রধানমন্ত্রী নৰেন্দ্র মোদীয়ে বিভিন্ন ৰাজ্যৰ মুখ্যমন্ত্রীসকলৰ সৈতে এক বৈঠকত মিলিত হ’ব৷ দেশত তীব্র ৰূপত বৃদ্ধি পাই থকা ক’ৰোনা মহামাৰী ৰোধ কৰাৰ বাবে পৰৱর্তী পদক্ষেপৰ ওপৰত এতিয়া দেশবাসীৰ দৃষ্টি নিবদ্ধ হৈ আছে৷ প্রধানমন্ত্রী নৰেন্দ্র মোদীৰ উপৰি মুখ্যমন্ত্রীসকলৰে আলোচনাত অংশ ল’ব কেন্দ্রীয় গৃহমন্ত্রী অমিত শ্বাহ, স্বাস্থ্যমন্ত্রী ডাঃ হর্ষ বর্ধন, বিত্তমন্ত্রী নির্মলা সীতাৰমণকে ধৰি মুখ্য সচিবসকল, গৃহ বিভাগ আৰু স্বাস্থ্য বিভাগৰ সচিবসকলে৷
উল্লেখ্য যে শেহতীয়া তথ্য অনুসৰি দেশত ক’ৰোনা ভাইৰাছত আক্রান্ত লোকৰ সংখ্যা ৬৩ হাজাৰলৈ বৃদ্ধি পাইছে৷ যোৱা ২৪ মার্চত প্রধানমন্ত্রী নৰেন্দ্র মোদীয়ে ২১ দিনীয়া লকডাউন ঘোষণা কৰাৰ পাছত ১৫ এপ্রিলৰ পৰা ৩ মে’লৈ দ্বিতীয় পর্যায়ৰ লকডাউন ঘোষণা কৰিছিল৷ কিন্তু এই দুয়োটা পর্যায়ৰ লকডাউনৰ মুঠ ৪০ দিনৰ পাছতো দেশত সংক্রমিত আৰু মৃত লোকৰ সংখ্যা হ্রাস নোপোৱাত তৃতীয় পর্যায়ৰ দুসপ্তাহজোৰা লকডাউন ঘোষণা কৰে৷ প্রণিধানযোগ্য যে মুখ্যমন্ত্রীসকলৰে হ’বলগীয়া আলোচনাত প্রধানমন্ত্রীয়ে ক’ভিড–১৯ৰে মোকাবিলাৰ উপৰি অর্থনৈতিক কাম–কাজৰো বুজ ল’ব৷ বৈঠকত লকডাউন বৃদ্ধি হ’ব নে শিথিল কৰা হ’ব, নতুনকৈ ৰেড জ’ন বা অ’ৰেঞ্জ জ’নত কোন কোন জিলা অন্তর্ভুক্ত হ’ব, এনেধৰণৰ সকলো দিশ বিশদভাৱে আলোচনা হোৱাৰ সম্ভাৱনা আছে৷