চলিত বর্ষত ছির্ডি সাইবাবা মন্দিৰলৈ ভক্তৰ ২৮৭ কোটি বৰঙণি

নিয়মীয়া বাৰ্তাঃ ৩১ ডিচেম্বৰঃ ছির্ডি সাইবাবা মন্দিৰে চলিত বর্ষটোত লাভ কৰা বৰঙণিয়ে পূর্বৰ অভিলেখ ভংগ কৰিছে৷ ২০১৯ বর্ষটোত এই মন্দিৰটোলৈ ভক্তপ্রাণ ৰাইজে দান হিচাপে আগবঢ়াইছে ২৮৭ কোটি টকা৷ মন্দিৰটোলৈ মানী অর্ডাৰ হিচাপে আহিছে ২ কোটি ১৭ লাখ ৮৩ হাজাৰ ৫১৫ টকা৷ ইফালে, ডেবিদ আৰু ক্রেডিট কার্ডেৰে বিভিন্নজনে আগবঢ়াইছে ১৭ কোটি ৫৯ লাখ ১১ হাজাৰ ৪২৪ টকা৷ অনলাইনেৰে মন্দিৰ কর্তৃপক্ষই লাভ কৰিছে ১৬ কোটি ২ লাখ ৫১ হাজাৰ ৬০৬ টকা৷ ইফালে, সোণ আৰু ৰূপৰ বিভিন্ন অলংকাৰো বৰঙণি হিচাপে লাভ কৰিছে মন্দিৰটোৱে৷ বর্ষটোত ১৯,০৪৮.৮৬ গ্রাম সোণ আৰু ৩,৯১,৭৫৭.৪৭ গ্রাম ৰূপ মন্দিৰটোলৈ আগবঢ়াইছে দেশ–বিদেশৰ ভক্তই৷ উল্লেখনীয় যে মন্দিৰটোলৈ গোপনে বৰঙণি হিচাপে আহিছে ১৫৬ কোটি ৪৯ লাখ ২ হাজাৰ ৩৫০ টকা৷ চলিত বর্ষত ছির্ডি সাইবাবা মন্দিৰে লাভ কৰা দান–বৰঙণিয়ে পূর্বৰ সকলো অভিলেখ ভংগ কৰিছে৷ উল্লেখনীয় যে চলিত বর্ষৰ ১ জানুৱাৰীৰ পৰা ২২ ডিচেম্বৰলৈ লাভ কৰা এই বৰঙণিৰ হিচাপ মুকলি কৰিছে মন্দিৰ কর্তৃপক্ষই৷