নিয়মীয়া বাৰ্তা, ৩ মে’ : ক’ভিড–১৯ক লৈ লকডাউন চলি থকাৰ সময়তে জম্মু–কাশ্মীৰৰ এল অ’ চিত যুদ্ধবিৰতি উলংঘন অব্যাহত ৰাখিছে পাকিস্তানী সেনাই৷ জম্মু–কাশ্মীৰৰ ৰামপুৰ ছেক্টৰৰ এল অ’ চিত পাকিস্তানী সেনাই যুদ্ধবিৰতি উলংঘনেৰে কৰা প্রৰোচিত গুলীচালনাত দুজন ভাৰতীয় জোৱানে প্রাণ হেৰুৱায় ৷ আৰক্ষীয়ে প্রকাশ কৰা মতে, শুকুৰবাৰে বিয়লি ৰামপুৰ ছেক্টৰত পাক সেনাৰ গুলীত ৩জন ভাৰতীয় জোৱান আহত হৈছিল ৷ আহত জোৱানকেইজনক চিকিৎসালয়ত ভর্তি কৰোৱাৰ কেইঘণ্টামান পিছত শনিবাৰে ইয়াৰে দুজনে প্রাণ হেৰুৱায় ৷ পাকিস্তানী সেনাক ভাৰতীয় সেনাবাহিনীয়ে যথোচিত প্রত্যুত্তৰ দিয়ে ৷ শুকুৰবাৰে উল্লিখিত যুদ্ধবিৰতি উলংঘন কৰাৰ কেইঘণ্টামান পিছত শনিবাৰে পুনৰ উৰিৰ হাজিপিৰ ছেক্টৰৰ এল অ’ চিত পাকিস্তানী সেনাই গুলীবর্ষণ কৰিছে ৷ চুবুৰীয়া দেশখনৰ সেনাই যুদ্ধবিৰতি উলংঘন কৰি উৰিত থকা ভাৰতীয় নিৰীক্ষণ চকীত গধুৰ অস্ত্রৰ লগতে লঘু অস্ত্রৰেও আক্রমণ চলাইছে ৷ ভাৰতীয় নিৰাপত্তা বাহিনীয়ে পাকিস্তানী সেনাক প্রত্যুত্তৰ দি আছে ৷