৪৯ শতাংশ অংশীদাৰিত্বৰে বিনিয়োগ কৰিব ২,৪৫০ কোটি টকা

নিয়মীয়া বাৰ্তা, ৮মার্চঃ দেশৰ শ্বেয়াৰ বজাৰ পুনৰ অভাৱনীয় পতন হোৱাত য়েছ বেংকৰ শ্বেয়াৰ বজাৰ ৫৬ শতাংশ নিম্নগামী হৈ ভয়ানক লোকচানৰ সন্মুখীন হৈছিল৷ বেংকটোক এই মন্দাৱস্থাৰ পৰা উদ্ধাৰ কৰিবলৈ আগবাঢ়ি আহিছে ষ্টেট বেংক অৱ ইণ্ডিয়া ৷ বেংকটোৰ অধ্যক্ষ ৰাজনীশ কুমাৰে মুম্বাইত এখন সংবাদ মেলত ঘোষণা কৰে যে এছ বি আইৰ ব’র্ডে য়েছ বেংকটোৰ ৪৯ শতাংশ অংশীদাৰিত্ব ক্রয় কৰাৰ সিদ্ধান্ত লৈছে৷ এই প্রক্রিয়াত য়েছ বেংকত এছ বি আয়ে ২,৪৫০ কোটি টকা বিনিয়োগ কৰিব৷ এই পৰিকল্পনাৰ বাবে এছ বি আয়ে আইনী কামসমূহ কৰি আছে ৷ উল্লেখ্য যে এই বিপর্যয়ৰ বাবে ৰিজার্ভ বেংকে এমাহলৈকে য়েছ বেংকৰ হিতাধিকাৰীয়ে এমাহত ৫০ হাজাৰ টকালৈহে ধন উলিয়াব পাৰিব বুলি ঘোষণা কৰে৷ ইফালে, এছ বি আইৰ এই সিদ্ধান্তক লৈ সমালোচনা কৰিছে কংগ্রেছ নেতা পি চিদাম্বৰমে৷ তেওঁ কয় যে এছ বি আইৰ অধ্যক্ষই য়েছ বেংকত বিনিয়োগ কৰাৰ সিদ্ধান্ত স্বেচ্ছাই লোৱা নাই৷ বেংকটোক এই কার্য কৰিবৰ বাবে বাধ্য কৰোৱা হৈছে৷