নিয়মীয়া বাৰ্তা, ২১ নৱেম্বৰঃ দেশৰ ৰাজধানী মহানগৰ দিল্লীত ক’ভিড–১৯ৰ সংক্রমণৰ তৃতীয়টো জোৱাৰ আৰম্ভ হোৱাৰ লগে লগে দিল্লী আৰু মুম্বাইৰ মাজত চলা বিমান তথা ৰে’লসেৱা পুনৰ বন্ধ হোৱাৰ আশংকাই দেখা দিছে৷ মহাৰাষ্ট্র চৰকাৰে দিল্লীৰ পৰা মুম্বাইলৈ চলাচল কৰা বিমানসমূহৰ সেৱা বন্ধ কৰাৰ চিন্তা–চর্চা চলাইছে৷
লক্ষণীয়ভাৱে দিল্লীত শেহতীয়াকৈ ক’ভিড–১৯ত আক্রান্তৰ সংখ্যা অভাৱনীয়ভাৱে বৃদ্ধি পাইছে৷ মহাৰাষ্ট্র চৰকাৰৰ এক সূত্রই সদৰী কৰা অনুসৰি দুয়োখন মহানগৰৰ মাজত চলাচল কৰা ৰে’লসেৱাও বন্ধ হোৱাৰ আশংকা আছে৷ তাৎক্ষণিকভাৱে চৰকাৰে এই সন্দর্ভত আনুষ্ঠানিকভাৱে কোনো বিবৃতি প্রকাশ কৰা নাই যদিও ইতিমধ্যে ক’ভিড সংহাৰত আক্রান্ত হোৱা মহাৰাষ্ট্রই পুনৰ মহামাৰীৰ তৃতীয়টো জোৱাৰত সংক্রমিত হোৱাৰ পৰা আঁতৰি থাকিবলৈ বিচাৰিছে৷
গতিকে দিল্লীৰ পৰা যাতে ৰাজ্যখনলৈ ক’ভিড–১৯ৰ দ্রুত সংক্রমণ ঘটিব নোৱাৰে সেই দিশটোৰ ওপৰত গুৰুত্ব প্রদান কৰিছে উদ্ধৱ থাকৰে চৰকাৰে৷ স্মর্তব্য যে যোৱা ২৮ অক্টোবৰৰ পৰা দিল্লীত ক’ভিড সংক্রমিত লোকৰ সংখ্যা অভাৱনীয়ভাৱে বৃদ্ধি পাইছে৷ প্রতিদিনে গড়ে ৫ হাজাৰ লোক আক্রান্ত হৈছে দিল্লীত৷ আনকি ১১ নৱেম্বৰত ৮ সহস্রাধিক লোক ক’ভিডত আক্রান্ত হৈছিল ৰাষ্ট্রীয় ৰাজধানীত৷