বিশেষ বাৰ্তা, ২৪ মেঃ যোৱা সপ্তাহটো ঐশ্বৰ্য ৰায় বচ্চনৰ বাবে অতি ব্যস্ত আছিল। সপ্তাহৰ শেষৰফালে কাঁ চলচ্চিত্ৰ মহোৎসৱৰ পৰা উভতি অহা অভিনেত্ৰীগৰাকীয়ে তেওঁৰ মাতৃ বৃন্দা ৰায়ৰ জন্মদিনৰ ফটো শ্বেয়াৰ কৰিছে। সোমবাৰে অভিনেত্ৰীগৰাকীয়ে নিজৰ ইনষ্টাগ্ৰাম পোষ্টত জন্মদিনৰ ফটো শ্বেয়াৰ কৰি লিখিছে, “হেপি বাৰ্থডে ডিয়াৰেষ্ট ডাৰ্লিং মমী-ড’ডা। লভ ইউ ফৰইভাৰ এণ্ড বেয়ণ্ড”। ফটোবোৰত ঐশ্বৰ্যৰ স্বামী অভিষেক বচ্চন আৰু কন্যা আৰাধ্যাও আছে। প্ৰতি বছৰৰ দৰে এইবাৰো সৌন্দৰ্যৰ ৰাণী ঐশ্বৰ্য ৰায় বচ্চনে কাঁ চলচ্চিত্ৰ মহোৎসৱত অংশগ্ৰহণ কৰিছিল, য’ত তেওঁ প্ৰসাধন সামগ্ৰীৰ অন্যতম প্ৰতিষ্ঠান ল’ৰিয়েলক প্ৰতিনিধিত্ব কৰিছিল। কাঁ ভ্ৰমণৰ সময়ত ঐশ্বৰ্যৰ লগত আছিল আৰাধ্যা আৰু অভিষেক বচ্চন। ৭৫ সংখ্যক কাঁ চলচ্চিত্ৰ মহোৎসৱত দুবাৰকৈ ৰেড কাৰ্পেটত ভূমুকি মাৰিছে অভিনেত্ৰীগৰাকীয়ে।